काठमाडौं। सरकारको मातहतमा आएको स्मार्ट टेलिकमको सम्पत्ति लिलामी गरेको आरोपमा नेपाल इन्भेष्टमेण्ट मेगा बैंकका प्रमुख कार्यकारी अधिकृत (सिईओ) ज्योतिप्रकाश पाण्डे पक्राउ परेका छन् ।

प्रहरीको केन्द्रीय अनुसन्धान ब्यूरो (सिआईबी) प्रमुख एआईजी डा. मनोज केसीले उनलाई पक्राउ गरिएको पुष्टि गरेका हुन् ।

अनुसन्धानका क्रममा उक्त बैंकले सरकारले टेकओभर गरेको स्मार्ट टेलिकमको सम्पत्ति एनसेललाई लिलाम गरेको खुलेको छ ।

यस विषयमा अनुसन्धानको माग गर्दै चार्टर्ड एकाउण्टेण्ट (सिए) भेषराज लुइँटेलले सर्वोच्च अदालतमा रिट दायर गरेका थिए ।

मुद्दाको अनुसन्धानका क्रममा बिनाधितो ४ अर्ब रुपैयाँभन्दा बढी ऋण प्रवाह गर्ने कार्यमा प्राइम बैंकको समेत मिलेमतो देखिएको सिआईबी स्रोतले जनाएको छ ।