काठमाडौं। नेपाली कांग्रेसका सचेतक निश्कल राईले गणेश पराजुलीको अभिव्यक्तिप्रति आपत्ति जनाएका छन् ।

प्रतिनिधिसभाको बुधबारको बैठकमा बोल्दै उनले अघिल्लो दिन बसेको बैठकमा रास्वपा संसदीय दलका उपनेता पराजुलीले न्यायाधीशसम्बन्धी विषय उठाएको भन्दै आलोचना गरे ।

राईले भने, ‘महाभियोग लागेका अवस्थामा बाहेक अन्य साधारण अवस्थामा न्यायाधीशहरूबारे सदनमा बहस गर्न नपाइने विषय संविधानमा उल्लेख छ । तर सत्तारुढ दलकै एक वरिष्ठ माननीयज्यूले गरिमामय सदनको रोस्ट्रममा उभिएर दुई तिहाइको दम्भ देखाउँदै सदनलाई लत्काएर न्यायाधीशको बारेमा बोल्नुभयो । यो अनैतिक, अराजनीतिक मात्र होइन, असंवैधानिक पनि छ । सभामुख महोदय, उहाँले संविधानको धारा १०५ पढ्नुभएन कि ?’

उनले नेपालको कुनै अदालतमा विचाराधीन मुद्दासम्बन्धी विषय तथा न्यायाधीशले कर्तव्य पालनाको सिलसिलामा गरेको न्यायिक कार्यबारे संसद्मा छलफल गर्न नपाइने संवैधानिक व्यवस्था रहेको उल्लेख गरे ।

राईले थपे, ‘उहाँ संविधानभन्दा के माथि हो ? के सत्तारुढ दललाई जे बोल्दा पनि संविधान बाधक नबन्ने हो ? रोस्ट्रममा उभिएर असंवैधानिक विषय उठाउने र सभामुख टुलुटुलु हेरेर बस्न मिल्दैन ।’

उनले उक्त विषयमा सभामुखले स्वयं रुलिङ गर्ने अपेक्षा गरेको भए पनि त्यसतर्फ ध्यान नपुगेको टिप्पणी गरे ।

राईको अभिव्यक्तिपछि गणेश पराजुलीले उठेर विरोध जनाएका थिए । त्यसपछि सभामुखले कुन नियमावलीअनुसार विरोध गरिएको हो भन्दै प्रश्न गरेका थिए ।

सभामुखले अघिल्लो दिनको अभिव्यक्ति आफूले अध्ययन गर्न बाँकी रहेको भन्दै पराजुलीलाई रोकेर बैठकको कारबाही अघि बढाएका थिए ।