काठमाडौं। नेकपा एमालेकी सांसद विष्णुमाया विकले पाँचथर र तेह्रथुम जोड्ने लुबुघाटमा अलपत्र परेको मोटरेबल पुलको निर्माण कार्य तत्काल अगाडि बढाउन माग गरेकी छन् ।

निर्माण कार्य थालनी भएको १५ वर्ष बित्दा पनि पाँचथरतर्फ तीनवटा पिलर ठढ्याउने बाहेक काम नभएको भन्दै उनले आक्रोश पोखिन् ।

बुधबार प्रतिनिधिसभा बैठकको शून्य समयमा बोल्ने उनले भनिन्, ‘निर्माण कार्य सुरु भएको १५ वर्ष भयो । पुल निर्माण कार्य सम्पन्न भएको छैन । उक्त पुल निर्माण कार्य स्वच्छन्द निर्माण सेवाले ठेका लिएको बुझिन्छ ।
पाँचथरतर्फ तीनवटा पिलर उठाएर पुल निर्माण कार्य अलपत्र छोडिएको छ ।’

उनले मोटरेबल पुल निर्माणको काम के कारणले सम्पन्न नभएको भन्दै सरकारसँग प्रश्न गरेकी छन् ।

तत्काल अनुसन्धान गरी पुल निर्माण कार्य अगाडि बढाउन उनले सरकारको ध्यानाकर्षण गराएकी छन् ।

यस्तै, सिन्धुलीको सुनकोशी गाउँपालिकाका श्रीकृष्ण विकको प्रहरी हिरासतमा भएको मृत्युप्रकरणको निष्पक्ष छानबिन गरी सत्य सार्वजनिक गर्न माग गरेकी छन् ।
दलितका लागि प्रहरी हिरासतसमेत सुरक्षित नभएको भन्दै यसले दलित समुदायलाई गम्भीर बनाएको बताइन् ।