काठमाडौं । जेनजी अभियन्ता मिराज ढुंगानाले आफू लगायत केही जेनजी साथीहरूलाई मध्यरातमा गिरफ्तार गर्ने तयारी भइरहेको खबर आएको भन्दै सरकारप्रति व्यङ्ग्यात्मक टिप्पणी गरेका छन्। उनले दशैँपछि आफूले वकालत गर्दै आएको वैकल्पिक राजनीतिक शक्तिबारे धारणा राख्ने र गिरफ्तारी दिनुपरे पनि दशैँपछि दिउँसो गर्न सरकारलाई आग्रह गरेका छन्।

ढुंगानाले सामाजिक सञ्जालमार्फत आफ्नो धारणा सार्वजनिक गर्दै आफूले ‘तेस्रो ध्रुव’ र जनविद्रोहपछि आवश्यक ठानेको वास्तविक वैकल्पिक शक्तिको पक्षमा दशैँपछि आवाज उठाउने बताएका हुन्।

‘म लगायत अरू केही जेनजी साथीहरूलाई मध्यरातमा गिरफ्तार गर्ने खबर आइरहेको रहेछ। म तेस्रो ध्रुव र यो जनविद्रोहपछि चाहिएको वास्तविक वैकल्पिक शक्तिको वकालत दशैँपछि गर्छु,’ उनले लेखेका छन्।

उनले सरकारलाई व्यङ्ग्य गर्दै गिरफ्तारी गर्नुपर्ने भए पनि दशैँपछि दिउँसो गर्न आग्रह गरेका छन्। पछिल्लो समय रातिको समयमा मात्रै देश निर्माण हुने गरेको हो कि भन्ने आशयमा उनले टिप्पणी गरेका छन्।

‘गिरफ्तारी पनि दिनमा, दिउँसो परेर दशैँपछि गर्नुहोला सरकारलाई मेरो आग्रह। आजकल देश राती मात्रै बन्दो रहेछ, के गर्नुहोला!’ उनले भनेका छन्।

ढुंगानाको अभिव्यक्तिले जेनजी आन्दोलनपछि उदाएको वैकल्पिक राजनीतिक शक्तिको बहस र अभियन्ताहरूको सुरक्षासम्बन्धी चिन्तालाई पुनः चर्चामा ल्याएको छ। यद्यपि, उनलाई वा अन्य अभियन्तालाई गिरफ्तार गर्ने तयारी भइरहेको भन्ने विषयमा सरकारी निकायबाट आधिकारिक पुष्टि भएको विवरण उपलब्ध छैन।