काठमाडौं । दसैँको चौथो दिन आज देशभरका देवी मन्दिर तथा शक्तिपीठहरूमा देवी कुस्माण्डाको पूजा-आराधना गरिँदैछ। नवरात्रिका नौ दिनमा नवदुर्गाका नौ स्वरूपको पूजा गर्ने परम्पराअनुसार आज देवी कुस्माण्डाको आराधना गरिन्छ।

धार्मिक मान्यताअनुसार देवी कुस्माण्डाले आफ्नो मुस्कानबाट ब्रह्माण्डको सृष्टि गरेको विश्वास गरिन्छ। त्यसैले उहाँलाई सृष्टि, शक्ति र ऊर्जाको प्रतीकका रूपमा लिने गरिन्छ।

आज बिहानैदेखि भक्तजनहरू विभिन्न देवी मन्दिर तथा शक्तिपीठमा पुगेर पूजाआजा गर्ने, फूलप्रसाद चढाउने र देवीको दर्शन गर्ने गर्छन्। देवी कुस्माण्डाको पूजा गर्नाले सुख, शान्ति, समृद्धि र आरोग्य प्राप्त हुने धार्मिक विश्वाससमेत रहेको छ।

नवरात्रिको अवसरमा देशभरका शक्तिपीठहरूमा भक्तजनको चहलपहल बढेको छ।