काठमाडौं। प्रमुख प्रतिपक्षी दल नेपाली कांग्रेसले नीति तथा कार्यक्रममाथि उठेका प्रश्नको जवाफ प्रधानमन्त्री वालेन्द्र शाह(बालेन)ले नदिने भए संसद् बैठक बहिष्कार गर्ने चेतावनी दिएको छ ।

प्रतिनिधिसभाको बैठकमा विपक्षी दलको तर्फबाट बोल्दै सांसद अर्जुननरसिंह केसीले प्रधानमन्त्रीले जवाफ दिन नआए आफूहरू गम्भीर रूपमा लिने बताए ।

उनले प्रधानमन्त्रीले संसदीय मर्यादा उल्लङ्घन गरेको आरोपसमेत लगाए ।

केसीले भने, ‘प्रधानमन्त्रीबाट एकपछि अर्को गरेर संसदीय परम्परा, मान्यता र त्यसका मूल्य-पद्धतिमाथि उपेक्षा भएको भन्ने आम रूपमा प्रश्न उठेको छ । प्रधानमन्त्रीको अनुपस्थितिमा उहाँले तोकेको कुनै पनि मन्त्रीले प्रस्तुत गर्ने परम्परा भए पनि त्यो पालना भएको छैन ।’

उनले थपे, ‘जवाफ दिने बेलामा पनि प्रधानमन्त्री अनुपस्थित रहे हामी बैठकमा सहभागी हुन सक्दैनौँ ।’

केसीले नीति तथा कार्यक्रम प्रस्तुत गर्दा राष्ट्रपतिले पढिरहेका बेला प्रधानमन्त्री उठेर हिँडेको प्रसंग पनि उठाउँदै त्यसलाई संसदीय असंवेदनशीलता भनेका छन् ।