काठमाडौँ ।धितोपत्र बजारमा शेयर कारोबार मापक नेप्से परिसूचक लगातार दोस्रो दिन पनि घटेको छ । बुधबार नेप्से सामान्य अङ्कले ओरालो लागेको हो ।

नेपाल स्टक एक्चेन्जका अनुसार नेप्से परिसूचक चार दशमलव १५ अङ्कले घटेर दुई हजार ७४० दशमलव २५ विन्दुमा पुगेको छ ।

यस्तै, ठूला कम्पनीको कारोबार मापन गर्ने सेन्सेटिभ परिसूचक पनि शून्य दशमलव ७० अङ्कले घट्दै ४६७ दशमलव ५५ मा सीमित भएको छ ।

बुधबार कुल ३३९ कम्पनीका ५६ लाख ४३ हजार २८८ कित्ता शेयर दुई अर्ब ८० करोड ७४ लाख ४६ हजार ३६१ रुपैयाँ बराबरमा खरिदबिक्री भएका छन् ।

कारोबार रकमका आधारमा एसवाई प्यानल नेपाल, रिडी पावर कम्पनी, साहस ऊर्जा, सोलु हाइड्रोपावर र रिलायन्स स्पिनिङ मिल्स अग्रस्थानमा रहे ।

त्यसैगरी, एशियन हाइड्रोपावर, एसवाई प्यानल, हिमालयन बैंकको बण्ड, एनआइसी एशिया ग्रोथ फण्ड–२ र सेञ्चुरी डिबेञ्चरका लगानीकर्ताले सबैभन्दा धेरै कमाएका छन् ।

यता, धौलागिरि लघुवित्त, झापा इनर्जी, सिटिजन बैंकको ऋणपत्र, रिज लाइन इनर्जी र आरबिबी फोकस–४० का लगानीकर्ताले सर्वाधिक गुमाएका छन् ।

यसअघि मंगलबार पनि नेप्से परिसूचक घटेको थियो ।