काठमाडौँ । श्रम संस्कृति पार्टीका प्रमुख सचेतकआरेन राईले संसद्मा कृषि, वन्यजन्तु आतंक र सरकारको कार्यशैलीबारे कडा टिप्पणी गरेका छन् ।

प्रतिनिधिसभा बैठकमा बोल्दै उनले देशमा उत्पादन भए पनि बजारको अभाव, किसानले मलजल नपाउने समस्या र व्यवस्थापन कमजोर हुँदा देशभर बाँदर आतंक फैलिएको बताए । उनले बाँदर आतंक नियन्त्रणका लागि सरकारले विधेयक किन नल्याएको भन्दै प्रश्न गरे ।

‘आफ्नो स्वार्थका लागि अध्यादेश ल्याउने, तर लाखौँ नागरिकको समस्यामा सरकारले चासो नदिने ?’भन्दै उनले सरकारको प्राथमिकतामाथि प्रश्न उठाए ।

उनले निकुञ्ज क्षेत्र आसपास वन्यजन्तुको आक्रमणबाट नागरिकले ज्यान गुमाइरहेको उल्लेख गर्दै त्यसतर्फ सरकारको ध्यानाकर्षण गराए । ‘वन्यजन्तुको आक्रमणले नागरिक मरिरहेका छन्, तर सरकार गम्भीर देखिँदैन,’ उनले भने ।

प्रमुख सचेतक राईले प्रधानमन्त्रीले संसद्लाई बेवास्ता गरेको आरोपसमेत लगाए । उनले प्रधानमन्त्रीले प्रतिपक्ष मात्रै नभई सत्तापक्षका सांसदहरूको आवाज पनि सुन्नुपर्ने बताए ।

‘प्रधानमन्त्रीले संसद्मा आएर जवाफ दिनुपर्छ । २७५ जना सांसदको कुरा सुन्नुपर्छ,’ उनले भने ।