एजेन्सी। पूर्वी कङ्गोमा इबोला भाइरसको प्रकोप घोषणा भएको एक महिनाभन्दा कम अवधिमा कम्तीमा १०१ जनाको मृत्यु भएको छ।

स्वास्थ्य अधिकारीहरूले सार्वजनिक गरेको पछिल्लो विवरणअनुसार सङ्क्रमण तीव्र गतिमा फैलिरहेको छ भने वास्तविक अवस्था अझ गम्भीर हुन सक्ने चिन्ता व्यक्त गरिएको हो।

स्थानीय स्वास्थ्य निकायका अनुसार आइतबारसम्म ५५० जनामा इबोला सङ्क्रमण पुष्टि भएको छ। तीमध्ये १०१ जनाको ज्यान गएको छ भने १९ जना उपचारपछि निको भएका छन्। सोमबार सार्वजनिक गरिएको अवस्था प्रतिवेदनमा यो जानकारी उल्लेख गरिएको छ।

स्वास्थ्य अधिकारीहरूका अनुसार प्रकोप सुरु भएको केही सातामै सङ्क्रमण फैलिन थालेको भए पनि औपचारिक पुष्टि ढिलो हुँदा नियन्त्रण प्रयास प्रभावित भएको छ। समयमै पहिचान हुन नसक्दा रोगको फैलावट रोक्न कठिन भएको उनीहरूको भनाइ छ।

प्रभावित क्षेत्रमा स्थानीय बासिन्दाको अविश्वास, स्वास्थ्यकर्मीमाथि हुने आक्रमण तथा विभिन्न सशस्त्र समूहको गतिविधिले नियन्त्रण अभियानलाई थप चुनौतीपूर्ण बनाएको छ। कतिपय क्षेत्रमा स्वास्थ्यकर्मी पुग्नसमेत कठिन भइरहेको बताइएको छ।

परीक्षण, उपचार र सङ्क्रमित व्यक्तिको सम्पर्क पहिचान गर्ने कार्यमा समेत समस्या देखिएको छ। स्वास्थ्य विज्ञहरूका अनुसार आधिकारिक रूपमा पुष्टि भएका सङ्क्रमितको सङ्ख्याभन्दा वास्तविक सङ्ख्या धेरै हुन सक्ने सम्भावना छ।

सुरक्षा चुनौती, कमजोर स्वास्थ्य पूर्वाधार र दुर्गम क्षेत्रमा स्वास्थ्य सेवाको सीमित पहुँचका कारण महामारी नियन्त्रणबाहिर जान सक्ने जोखिम बढ्दै गएको चेतावनी दिइएको छ।

यसपटकको प्रकोप दुर्लभ ‘बुन्डिबुग्यो’ प्रकारको इबोला भाइरसका कारण फैलिएको हो। यो कङ्गोमा विगतमा बढी देखिने ‘जाइर’ प्रकारको इबोलाभन्दा फरक रहेको बताइएको छ।

‘जाइर’ प्रकारका लागि खोप तथा उपचार उपलब्ध भए पनि ‘बुन्डिबुग्यो’ प्रकारका लागि हालसम्म कुनै स्वीकृत खोप वा विशेष उपचार उपलब्ध छैन। यही कारण स्वास्थ्य अधिकारीहरूले रोकथाम, निगरानी र जनचेतनामै विशेष जोड दिएका छन्।

विश्लेषकहरूका अनुसार लामो समयदेखि जारी सशस्त्र द्वन्द्व, कमजोर स्वास्थ्य प्रणाली र सरकारी निकायप्रतिको जनविश्वासको कमी कङ्गोमा इबोला नियन्त्रणका प्रमुख चुनौती बनेका छन्। यसपटकको प्रकोपमा पनि यिनै कारणले महामारी नियन्त्रण अभियान प्रभावित भएको देखिएको छ।

स्वास्थ्य अधिकारीहरूले प्रभावित क्षेत्रका बासिन्दालाई सतर्क रहन, शंकास्पद लक्षण देखिए तुरुन्त स्वास्थ्य संस्थामा सम्पर्क गर्न तथा स्वास्थ्यकर्मीहरूसँग सहयोग गर्न आग्रह गरेका छन्।