काठमाडौं। असार १५ को अवसरमा गोकर्णेश्वर नगरपालिका–७ स्थित शिवचोक फाँटमा २३औँ धान रोपाइँ तथा दही–चिउरा कार्यक्रम आयोजना हुने भएको छ।

राष्ट्रिय लोक सञ्चारकर्मी नेपालको आयोजना, राष्ट्रिय लोक सञ्चारकर्मी नेपाल उपत्यका समितिको सहआयोजना, सांस्कृतिक संस्थानको सहकार्य तथा गोकर्णेश्वर नगरपालिकाको समन्वयमा हुन लागेको उक्त कार्यक्रमले नेपाली कृषि संस्कृति, लोकपरम्परा र सामाजिक सद्भावलाई प्रवर्द्धन गर्ने उद्देश्य लिएको आयोजकले जनाएको छ।

कार्यक्रममा परम्परागत धान रोपाइँसँगै दही–चिउरा खाने संस्कृतिलाई उत्सवका रूपमा मनाइनेछ। साथै, लोकदोहोरी क्षेत्रका लोकप्रिय कलाकार कृष्ण कडेल सहित इन्द्रणी टिम, रीता थापा मगर, किरणबाबु पुन, राजु परियार, बद्रि पंगेनी, टिका सानु लगायतका चर्चित कलाकारहरूको सांगीतिक प्रस्तुति रहनेछ।

यसै अवसरमा गोविन्द शर्मा स्मृति पत्रकारिता पुरस्कारबाट रेडियो नेपालका वरिष्ठ सञ्चारकर्मी तथा गीतकार राम थापा अविरललाई नगद रु। ५,५५५ सहित सम्मान गरिने कार्यक्रम छ।

आयोजकका अनुसार कार्यक्रममा विभिन्न क्षेत्रका व्यक्तित्व तथा संस्थाहरूको पनि सहयोग रहनेछ। कार्यक्रममा एक्स्ट्रीम इनर्जी ड्रिंक, इशा फाउण्डेशन, दरबार रोधी क्लब, सोफा हब, गायक प्रकाश कटवाल, समाजसेवी रामकृष्ण बराल, रमेश विश्वकर्मा तथा अनिल सेडाईलगायतको सहयोग रहेको जनाइएको छ।

आयोजकले कृषि संस्कृति, लोकसंगीत र सामाजिक एकतालाई सुदृढ बनाउने यस कार्यक्रममा स्थानीयवासी, सञ्चारकर्मी, कलाकार तथा संस्कृति प्रेमीहरूलाई उत्साहपूर्वक सहभागिता जनाउन आग्रह गरेको छ।