काठमाडौं । उत्तर कोरियाली नेता किम जोङको चीन भ्रमणले नयाँ चासो जन्माएको छ। शनिबार चीन पुगेका किम बेइजिङ नपुगी स्वदेश फर्किने तयारीमा रहेको विवरण सार्वजनिक भएपछि उनको यात्रालाई अर्थपूर्ण रूपमा हेरिएको हो।

चीन र उत्तर कोरियाले औपचारिक घोषणा नगर्दै सार्वजनिक भएको भ्रमणमा किम नयाँ यालु नदीमाथिको पुल हुँदै सीमावर्ती सहर डानडोङ पुगेका थिए। दक्षिण कोरियाली अधिकारीहरूका अनुसार चिनियाँ प्रधानमन्त्री ली छ्याङले उनलाई त्यहीँ भेटेका थिए।

सन् २०२५ सेप्टेम्बरपछि चीन पुगेका किमको यो पहिलो भ्रमण हो। तर, यसपटक चिनियाँ राष्ट्रपति सी चिनफिङसँग उनको भेटवार्ता हुने सम्भावना स्पष्ट भएको छैन। दक्षिण कोरियाली समाचार एजेन्सी योनहापका अनुसार किम शनिबार नै उत्तर कोरिया फर्किने अपेक्षा गरिएको थियो। चीनको कम्युनिस्ट पार्टीका उच्चस्तरीय बैठक सोमबारदेखि सुरु हुने भएकाले उनी त्यसअघि बेइजिङ जाने सम्भावना कम रहेको दक्षिण कोरियाली अधिकारीहरूको भनाइ थियो।

त्यस्तै, किमको भ्रमणको समयले पनि ध्यान खिचेको छ। सन् १९५० देखि १९५३ सम्म चलेको कोरियाली युद्धमा चीन उत्तर कोरियाको पक्षबाट सहभागी भएको थियो। युद्धमा चीनको सहभागितासँग सम्बन्धित वार्षिकोत्सवको पूर्वसन्ध्यामा किम चीन पुगेका हुन्। यसै महिना सञ्चालनमा आएको नयाँ यालु नदी पुलले दुई देशबीचको व्यापार र आवतजावत विस्तार गर्ने अपेक्षा गरिएको छ। वर्षौँको ढिलाइपछि सञ्चालनमा आएको यो पुल सीमापार सम्पर्कको महत्त्वपूर्ण माध्यम बनेको छ।

किमका विदेश भ्रमण सामान्यतया गोप्य राखिने गरेका छन्। यसपटक पनि चीन र उत्तर कोरियाले उनको यात्राबारे तत्काल औपचारिक जानकारी दिएका थिएनन्। दक्षिण कोरियाली अधिकारी र सञ्चारमाध्यमबाट भ्रमणको विवरण सार्वजनिक भएको हो। यसअघि विदेश भ्रमणमा रेल प्रयोग गर्दै आएका किम यसपटक नयाँ पुल हुँदै चीन प्रवेश गरेको विवरणले पनि ध्यान खिचेको छ।

किमले सन् २०१८ मा तीनपटक चीन भ्रमण गरेका थिए। मार्चमा पहिलोपटक बेइजिङ पुगेका उनी मे र जुनमा पनि चीन गएका थिए। त्यसपछि सन् २०१९ जनवरीमा चौथोपटक चीन पुग्दा उनले सीसँग भेटवार्ता गरेका थिए। कोभिड-१९ महामारी र सीमा आवागमनमा लगाइएका प्रतिबन्धका कारण त्यसपछि उनको चीन भ्रमण लामो समय रोकिएको थियो।

सन् २०२५ सेप्टेम्बरमा किम पाँचौँपटक चीन पुगेका थिए। दोस्रो विश्वयुद्धको अन्त्य भएको ८०औँ वार्षिकोत्सवका अवसरमा बेइजिङमा आयोजित सैन्य परेडमा सहभागी हुन उनी विशेष रेलबाट चीन गएका थिए। उक्त भ्रमणका क्रममा उनले सीसँग भेटवार्ता गर्नुका साथै रुसी राष्ट्रपति भ्लादिमिर पुटिनसँग पनि छलफल गरेका थिए।

चीन उत्तर कोरियाको प्रमुख आर्थिक तथा कूटनीतिक सहयोगी हो। पछिल्ला वर्षमा उत्तर कोरियाले रुससँगको सम्बन्ध पनि बलियो बनाउँदै आएको छ। यस्तो अवस्थामा चीनसँगको सम्बन्धलाई निरन्तरता दिनु प्योङयाङका लागि महत्त्वपूर्ण छ। साथै, किमको पछिल्लो यात्राले दुई देशबीचको सम्बन्ध र सीमापार सम्पर्कको महत्त्वलाई फेरि चर्चामा ल्याएको छ।