काठमाडौं। नायिका उषा रजकले सामाजिक सञ्जालमार्फत मध्यरातमा सन्जोक कार्की नाम गरेका व्यक्तिले आफूलाई फोन तथा मेसेन्जरमार्फत लगातार सम्पर्क गरी मानसिक तनाव दिएको (मेन्टल ह्यारेसमेन्ट) आरोप लगाएकी छन्।

रजकले आफ्नो आधिकारिक फेसबुक पेजमार्फत च्याटका स्क्रिनसटसमेत सार्वजनिक गर्दै उक्त व्यक्ति सन्जोक कार्की भएको दाबी गरेकी हुन्। उनले भिडियो सन्देशमार्फत पनि घटनाबारे जानकारी दिँदै आफूलाई रातभरि अनावश्यक रूपमा फोन गरिएको बताएकी छन्।

सार्वजनिक गरिएको मेसेन्जर स्क्रिनसटका अनुसार सन्जोक कार्की नामका प्रयोगकर्ताले राति ३:१९, ४:०४ र ४:२३ बजे गरी तीन पटक लगातार कल गरेको देखिन्छ।

रजकका अनुसार यस्तो लगातारको सम्पर्कले आफूलाई मानसिक रूपमा असहज बनाएको र यसलाई ‘ह्यारेसमेन्ट’का रूपमा लिनुपर्ने उनको भनाइ छ।

उनीद्वारा सार्वजनिक भिडियोमा उनले सन्जोक कार्कीलाई गृहमन्त्री सुदन गुरुङका स्वकीय सचिव जेम्स कार्कीका भाइ भएको दाबीसमेत गरेकी छन्। यस विषयमा उनले सार्वजनिक रूपमा प्रश्न उठाउँदै घटनालाई सामान्य रूपमा नलिन आग्रह गरेकी छन्।

रजकले यस विषयमा साइबर ब्युरोमा उजुरी दिन खोज्दा प्रहरीले रिपोर्ट दर्ता गर्न अस्वीकार गरेको पनि आरोप लगाएकी छन्।

उनका अनुसार प्रहरी अधिकारीहरूले रिपोर्ट दर्ताका लागि अपमानजनक वा आपराधिक शब्द स्पष्ट रूपमा प्रयोग भएको हुनुपर्ने बताएका थिए। रजकले भने आफूले सामान्य मानसिक तनाव र लगातारको फोनकललाई नै उजुरीको आधार बनाएको बताएकी छन्।

रजकले भिडियो सन्देशमा भ्रष्टाचार र शक्ति दुरुपयोगविरुद्ध उठेको आन्दोलन (जेनजी आन्दोलन) पछि बनेको प्रतिनिधित्वलाई सम्मान गर्नुपर्ने भन्दै यस्तो व्यवहारले त्यसको मर्ममाथि प्रश्न उठ्ने बताएकी छन्।

उनले सामाजिक सञ्जालमार्फत सार्वजनिक सन्देश दिँदै कसैलाई पनि यसरी अनावश्यक रूपमा मानसिक तनाव नदिन आग्रह गरेकी छन्।

रजकले उल्लेख गरेको सन्जोक कार्की नामको फेसबुक अकाउन्टमार्फत सम्पर्क गर्ने प्रयास गर्दा कुनै प्रतिक्रिया नआएको बताइएको छ। त्यस्तै, जेम्स कार्कीलाई सम्पर्क गर्दा फोन नउठाएको पनि उनले जानकारी दिएकी छन्।

घटनाबारे आधिकारिक निकायबाट थप पुष्टि भने भइसकेको छैन।

भिडियो: