काठमाडौं। लोकतान्त्रिक गणतन्त्र कङ्गो (डीआरसी) मा इबोला भाइरसको संक्रमण तीव्र बन्दै गएको छ। विश्व स्वास्थ्य संगठन (डब्लुएचओ) का अनुसार हालसम्म १ हजार ५०२ जनामा संक्रमण पुष्टि भएको छ भने ४७३ जनाले ज्यान गुमाइसकेका छन्।

संक्रमितको संख्या निरन्तर बढिरहेकाले स्वास्थ्य अधिकारीहरूले अवस्थालाई गम्भीर जनस्वास्थ्य संकटका रूपमा हेरिरहेका छन्।

डीआरसीका जनस्वास्थ्य अधिकारीहरूले शुक्रबार सार्वजनिक गरेको पछिल्लो विवरणअनुसार हाल ६२८ जना संक्रमित विभिन्न अस्पतालमा उपचाररत छन्। यस अवधिमा २२९ जना उपचारपछि निको भएका छन् भने थप २१३ जना नयाँ संक्रमित फेला परेका छन्। तीमध्ये ६३ जनाको मृत्यु भएको सरकारी विवरणमा उल्लेख छ।

विश्व स्वास्थ्य संगठनका अफ्रिका क्षेत्रीय निर्देशक मोहम्मद याकुब जनाबीले पूर्वी कङ्गोका इटुरी र उत्तरी किभु प्रान्तमा संक्रमण अझै नियन्त्रणमा आउन नसकेको बताएका छन्। उनका अनुसार ती क्षेत्रमा भाइरसको संक्रमण निरन्तर फैलिरहेकाले स्वास्थ्य निकायको प्रयासका बाबजुद अवस्था चुनौतीपूर्ण बनेको छ। उनले हालको प्रकोपलाई इबोलाको इतिहासमै सबैभन्दा ठूलो प्रकोपमध्ये एक भएको उल्लेख गरेका छन्।

संक्रमण नियन्त्रणमा सबैभन्दा ठूलो चुनौती सुरक्षा अवस्था बनेको डब्लुएचओका अधिकारीहरूले बताएका छन्। डीआरसीमा कार्यरत डब्लुएचओका विशेषज्ञ पियरे अकिलिमालीका अनुसार सशस्त्र समूहको गतिविधिका कारण प्रभावित क्षेत्रमा स्वास्थ्यकर्मी सहज रूपमा पुग्न सकिरहेका छैनन्। यसले संक्रमितको पहिचान, उनीहरूको सम्पर्कमा आएका व्यक्तिको खोजी तथा संक्रमण नियन्त्रणका कार्यक्रम प्रभावकारी रूपमा सञ्चालन गर्न कठिनाइ उत्पन्न गरेको छ।

विशेषगरी इटुरीका केही प्रभावित क्षेत्र खानी सञ्चालन हुने भएकाले विभिन्न स्थानबाट मानिसको निरन्तर आवागमन हुने गरेको छ। स्वास्थ्य अधिकारीहरूका अनुसार यही कारण भाइरस नयाँ क्षेत्रमा फैलिने जोखिम अझ बढेको छ।

संक्रमण बढ्दै जाँदा सम्भावित उपचारको खोजी पनि सँगसँगै अघि बढाइएको छ। विश्व स्वास्थ्य संगठनले बुन्डिबुग्यो प्रजातिको इबोला भाइरसबाट हुने संक्रमणका लागि सम्भावित उपचारको प्रभावकारिता परीक्षण गर्न डीआरसीमा क्लिनिकल अध्ययन सुरु गरिएको जनाएको छ। हालसम्म यस प्रकारको इबोलाका लागि अन्तर्राष्ट्रिय रूपमा स्वीकृत खोप वा विशेष उपचार उपलब्ध नभएकाले बिरामीको अवस्था व्यवस्थापन र सहयोगात्मक उपचारमै स्वास्थ्य सेवा केन्द्रित छ।

स्वास्थ्य प्रणालीमाथि बढ्दो दबाबका बीच डब्लुएचओले प्रभावित क्षेत्रमा निगरानी, उपचार तथा जनचेतनामूलक कार्यक्रमलाई थप प्रभावकारी बनाउने प्रयास जारी रहेको जनाएको छ।

स्वास्थ्य अधिकारीहरूले नागरिकलाई संक्रमणबाट जोगिन व्यक्तिगत सरसफाइमा विशेष ध्यान दिन, बिरामीसँग प्रत्यक्ष सम्पर्क गर्दा सावधानी अपनाउन तथा स्वास्थ्यकर्मीले दिएका निर्देशनको पूर्ण पालना गर्न आग्रह गरेका छन्।