काठमाडौं। बलिउड अभिनेता आमिर खानले आफ्नी साथी गौरी स्प्रैटसँग वैवाहिक सम्बन्धमा बाँधिने तयारी गरेको दाबी भारतीय सञ्चारमाध्यमहरूमा गरिएको छ।

प्रकाशित विवरणअनुसार आमिरले भव्य समारोहको सट्टा परिवारका सदस्य र निकट साथीभाइको उपस्थितिमा आफ्नै निवासमा सानो कार्यक्रममार्फत विवाह गर्ने योजना बनाएका छन्।

आमिर र गौरी केही समययता सार्वजनिक रूपमा सम्बन्धमा देखिँदै आएका छन्। गत वर्ष आफ्नो ६०औँ जन्मदिनका अवसरमा आमिरले गौरीलाई आफ्नी साथीका रूपमा सार्वजनिक परिचय गराएका थिए। त्यसयता उनीहरूको सम्बन्धबारे विभिन्न सञ्चारमाध्यममा चर्चा हुँदै आएको छ।

आमिरले यसअघि रीना दत्ता र किरण रावसँग विवाह गरेका थिए। उनले रीना दत्तासँग सन् १९८६ मा विवाह गरेका थिए भने पछि सम्बन्धविच्छेद भएको थियो। त्यसपछि सन् २००५ मा किरण रावसँग विवाह गरे पनि उनीहरू पनि अलग भइसकेका छन्।

गौरी स्प्रैट बेङ्गलुरु निवासी हुन्। उनी सौन्दर्य तथा फेसन व्यवसायसँग आबद्ध रहेको बताइएको छ। भारतीय सञ्चारमाध्यमका अनुसार उनको पनि यसअघि विवाह भइसकेको थियो।

आमिर र गौरीबीच करिब २५ वर्षअघिदेखिको चिनजान रहेको र पछिल्ला वर्षहरूमा त्यो सम्बन्ध थप प्रगाढ बनेको बताइन्छ।