काठमाडौं। चलचित्र ‘बेहुली’ को नयाँ पोस्टर सार्वजनिक गर्दै प्रदर्शन मिति परिवर्तन गरिएको छ। अब यो चलचित्र भदौ २६ गतेदेखि देशभर प्रदर्शनमा आउने भएको छ।

सार्वजनिक पोस्टरले विद्रोही प्रेमकथाको संकेत गर्छ। पोस्टरमा अभिनेता पारस बम ठकुरी (कुलब्वाय) गम्भीर भावमा देखिएका छन्। उनको शरीरमा सामान्य चोटका चिन्ह छन् भने नाडीमा हतकडी लगाइएको छ।

विवाहको पहिरनमा सजिएकी अभिनेत्री दिव्या रायमाझी शान्त मुद्रामा पारसको छातीमा टाउको अडेस लगाएकी छन्। पोस्टरले प्रेम र विवाहका लागि गरिएको संघर्ष तथा विद्रोहको भाव प्रस्तुत गरेको देखिन्छ।

चलचित्रको निर्देशन सशान कँडेल ले गरेका हुन् भने कथा माधव शर्मा ले लेखेका छन्। चलचित्रमा पारस र दिव्यासँगै पदम तामाङ, सन्तोष बानियाँ, सरिता गिरी, विशाल पहारी, कर्मा लामा, दीपक गौली, विमल यादव, अविरल श्रेष्ठ, सविन कट्टेल र समायरा थापा मगर लगायत कलाकारहरूको अभिनय रहेको छ।

चलचित्रको छायांकन नरेन्द्र मैनाली ले गरेका छन् भने सम्पादन विकास दाहाल ले गरेका छन्।

अर्जुन पोखरेल को संगीत रहेको चलचित्रका निर्माता प्रताप शमशेर राणा हुन्। कार्यकारी निर्मातामा शंकर कोइराला र रमेश सिलवाल, सह-निर्मातामा दुर्गा खरेल र शिशिर श्रेष्ठ रहेका छन्।

कोसिसराज क्षेत्री र सम्राट क्षेत्री लाइन प्रोड्युसर हुन्।