काठमाडौं। यशराज फिल्म्सको चर्चित ‘स्पाइ युनिभर्स’अन्तर्गत निर्माण गरिएको बलिउड फिल्म ‘अल्फा’ प्रदर्शनको पहिलो चार दिनमा विश्वभर ६३ करोड ६० लाख भारतीय रुपैयाँ कमाउन सफल भएको छ।

आदित्य चोपडाको निर्माण तथा शिव रवैलको निर्देशनमा बनेको फिल्मले सुरुआती सप्ताहन्तमा उत्साहजनक कमाइ गरे पनि सोमबार भने बक्स अफिसमा उल्लेख्य गिरावट देखिएको छ।

फिल्मले भारतमा प्रदर्शनको पहिलो दिन ९ करोड २५ लाख भारतीय रुपैयाँको ग्रस कमाइ गर्दै ओपनिङ गरेको थियो। दोस्रो दिन शनिबार ११ करोड ५० लाख रुपैयाँ र आइतबार १३ करोड २५ लाख रुपैयाँ संकलन गरेको थियो। तर, चौथो दिन सोमबार फिल्मको कमाइ घटेर ३ करोड ३५ लाख रुपैयाँमा सीमित भएको छ।

चार दिनको अवधिमा भारतभित्र मात्रै फिल्मले ३७ करोड ८५ लाख भारतीय रुपैयाँको ग्रस व्यापार गरेको छ भने विश्वव्यापी बक्स अफिस संकलन ६३ करोड ६० लाख भारतीय रुपैयाँ पुगेको निर्माण पक्षले जनाएको छ।

यद्यपि यशराज स्पाइ युनिभर्सका अघिल्ला सफल फिल्महरूको तुलनामा ‘अल्फा’को सुरुआती प्रदर्शन अपेक्षाअनुसार बलियो हुन नसकेको विश्लेषण गरिएको छ। सप्ताहन्तमा राम्रो कमाइ गरे पनि सोमबार आएको तीव्र गिरावटले आगामी दिनको व्यापारमा चुनौती देखिएको छ।

फिल्ममा आलिया भट्ट, शर्वरी, अनिल कपुर र बबी देओल मुख्य भूमिकामा छन्। साथै, अभिनेता ऋतिक रोशनले विशेष भूमिकामा अभिनय गरेका छन्।

उनी ‘वार’ र ‘वार–२’बाट चर्चित स्पाइ पात्र मेजर कबिर धालीवालका रूपमा ‘अल्फा’मा पनि देखिएका छन्, जसले यशराजको स्पाइ युनिभर्सलाई थप विस्तार गरेको छ।