काठमाडौं । विश्व चलचित्र उद्योगका चर्चित अभिनेता स्याम नीलको ७८ वर्षको उमेरमा निधन भएको छ।

उनको परिवारले अस्ट्रेलियाको सिड्नीमा अचानक र अप्रत्याशित रूपमा निधन भएको पुष्टि गरेको हो। परिवारका अनुसार उनी पछिल्लो समय क्यान्सरमुक्त भएर सामान्य जीवन बिताइरहेका थिए।

केही वर्षअघि दुर्लभ प्रकारको नन–हजकिन्स लिम्फोमासँग संघर्ष गरेका नीलले सफल उपचारपछि क्यान्सरलाई जितेका थिए। परिवारले उनको निधनलाई अप्रत्याशित घटना भएको जनाएको छ।

स्याम नील पाँच दशकभन्दा लामो अभिनय यात्रामा विश्व चलचित्र उद्योगका सबैभन्दा सम्मानित कलाकारमध्ये एक मानिन्थे। गम्भीर पात्रलाई सहज ढंगले जीवन्त बनाउने क्षमता, प्रभावशाली अभिनय र सशक्त पर्दा उपस्थितिका कारण उनले फरक पहिचान स्थापित गरेका थिए।

सन् १९९३ मा प्रदर्शनमा आएको ‘जुरासिक पार्क’ मा पुरातत्त्वविद् डा. एलन ग्रान्टको भूमिका निर्वाह गरेपछि उनले अन्तर्राष्ट्रिय ख्याति कमाएका थिए। उक्त चलचित्रले उनलाई विश्वभरका दर्शकमाझ लोकप्रिय बनाएको थियो र आज पनि त्यो पात्र उनको करियरको सबैभन्दा स्मरणीय भूमिकामध्ये एक मानिन्छ।

उनले ‘द पियानो’, ‘द हन्ट फर रेड अक्टोबर’, ‘डेड क्याम’, ‘इभेन्ट होराइजन’ लगायतका चर्चित चलचित्रमा अभिनय गरेका थिए। चलचित्रसँगै टेलिभिजन क्षेत्रमा पनि उनले उल्लेखनीय योगदान दिएका थिए। विशेषगरी चर्चित श्रृंखला ‘पिकी ब्लाइन्डर्स’ मा निर्वाह गरेको भूमिकाले नयाँ पुस्ताका दर्शकमाझ पनि उनको लोकप्रियता कायम राखेको थियो।

निधनको खबर सार्वजनिक भएपछि विश्वभरका चलचित्रकर्मी, निर्देशक, कलाकार तथा लाखौं प्रशंसकले सामाजिक सञ्जालमार्फत श्रद्धाञ्जली अर्पण गरिरहेका छन्। उनीसँग काम गरेका धेरै कलाकारले उनको व्यावसायिकता, सरल स्वभाव र अभिनयप्रतिको समर्पणलाई स्मरण गरेका छन्।

स्याम नीलको निधनसँगै विश्व चलचित्र उद्योगले एक अनुभवी, बहुआयामिक र प्रभावशाली कलाकार गुमाएको छ।

उनले सिर्जना गरेका पात्र, अभिनयको शैली र सिनेमाप्रतिको समर्पणले विश्वभरका चलचित्रप्रेमी र भावी कलाकारलाई लामो समयसम्म प्रेरणा दिइरहने विश्वास गरिएको छ।