काठमाडौं। प्रधानमन्त्री बालेन्द्र शाहले पुँजी बजार, धितोपत्र व्यवसाय तथा बीमा क्षेत्रका सरोकारवालासँग विशेष छलफल गरेका छन्।

प्रधानमन्त्री तथा मन्त्रिपरिषद्को कार्यालय, सिंहदरबारमा सोमबार आयोजित छलफलमा पुँजी बजारको वर्तमान अवस्था, सुधारका सम्भावित उपाय तथा बीमा क्षेत्रका चुनौती र अवसरबारे विचार-विमर्श भएको जनाइएको छ।

छलफलमा नेपाल धितोपत्र बोर्ड (सेबोन)का अध्यक्ष गोपाल भट्ट, नेपाल स्टक एक्सचेन्ज (नेप्से)का अध्यक्ष अमृत लम्साल, स्टक ब्रोकर एसोसिएसन अफ नेपालका अध्यक्ष सागर ढकाल, नासा सेक्युरिटिजका सन्दीप जलान, नेप्सेका पूर्व प्रमुख कार्यकारी अधिकृत सीताराम थपलिया, नेपाल लाइफ इन्स्योरेन्सका प्रमुख कार्यकारी अधिकृत नवराज सिलवाल, नागरिक स्टक डिलर कम्पनी लिमिटेडका प्रमुख कार्यकारी अधिकृत महेश्वरलाल श्रेष्ठ, प्रिया राज रेग्मी तथा अम्बिका प्रसाद पौडेललगायतको सहभागिता रहेको थियो।

प्रधानमन्त्री कार्यालयका अनुसार बैठकमा पुँजी बजारको विकास, लगानीकर्ताको विश्वास अभिवृद्धि, नियामकीय सुधार, धितोपत्र बजारको स्थायित्व तथा बीमा क्षेत्रको प्रभावकारी सञ्चालनका विषयमा सरोकारवालाहरूले आफ्ना सुझाव राखेका थिए।

प्रधानमन्त्री शाहले निजी क्षेत्र र नियामक निकायसँग निरन्तर संवाद गर्दै वित्तीय क्षेत्रका समस्या समाधान र सुधारका लागि आवश्यक नीतिगत पहल अघि बढाउने प्रतिबद्धता व्यक्त गरेको प्रधानमन्त्रीको सचिवालयले जनाएको छ।