काठमाडौं । अफ्रिकी मुलुक लोकतान्त्रिक गणतन्त्र कङ्गोमा फैलिएको इबोला भाइरसको प्रकोप थप गम्भीर बन्दै गएको छ। कङ्गोको स्वास्थ्य मन्त्रालयका अनुसार हालसम्म इबोलाका कारण कम्तीमा ९३० जनाको मृत्यु भइसकेको छ भने २ हजार ३४४ जनामा संक्रमण पुष्टि भएको छ।

मन्त्रालयले शनिबार सार्वजनिक गरेको विवरणअनुसार पछिल्लो २४ घण्टामा मात्रै ३७ जनाको मृत्यु भएको छ, जुन यो प्रकोप सुरु भएयताकै उच्च दैनिक मृत्युमध्ये एक हो। अधिकारीहरूका अनुसार गत मे १५ मा पूर्वी कङ्गोमा घोषणा गरिएको यो प्रकोप तीव्र गतिमा फैलिरहेको छ।

यसपटक फैलिएको ‘बुन्डिबुग्यो’ प्रजातिको इबोला भाइरस अपेक्षाकृत दुर्लभ मानिन्छ। स्वास्थ्य अधिकारीहरूका अनुसार यस भाइरसविरुद्ध हालसम्म स्वीकृत खोप वा प्रभावकारी उपचार विधि उपलब्ध छैन, जसका कारण संक्रमण नियन्त्रण चुनौतीपूर्ण बनेको छ।

सबैभन्दा बढी प्रभावित इतुरी प्रान्तमा सुरक्षा अवस्था कमजोर रहेकाले स्वास्थ्यकर्मी र उपचार टोलीलाई प्रभावित क्षेत्रमा पुग्न कठिनाइ भइरहेको छ। स्वास्थ्य मन्त्रालयका अनुसार प्रकोप सुरु भएदेखि हालसम्म स्वास्थ्य संस्था र उपचार टोलीमाथि कम्तीमा १२ वटा आक्रमण भइसकेका छन्, जसले रोग नियन्त्रण अभियानलाई थप प्रभावित बनाएको छ।

यता, तलब नपाएको भन्दै केही स्वास्थ्यकर्मीले कामसमेत छाडेका छन्। संक्रमणको अग्रपंक्तिमा खटिएका ३६ जना स्वास्थ्यकर्मीको पनि इबोलाकै कारण मृत्यु भएको मन्त्रालयले जनाएको छ।

हाल ७२४ जना संक्रमित विभिन्न आइसोलेसन केन्द्र र अस्पतालमा उपचाररत छन्। सरकारले प्रभावित क्षेत्रमा संक्रमितको उपचार, सम्पर्कमा आएका व्यक्तिको निगरानी तथा संक्रमण नियन्त्रणका कार्यक्रमलाई तीव्र बनाएको जनाएको छ। तर सुरक्षा चुनौती, सीमित स्वास्थ्य स्रोत र खोपको अभावका कारण इबोलाको प्रकोप नियन्त्रणमा ल्याउन अझै कठिनाइ भइरहेको अधिकारीहरूको भनाइ छ।