काठमाडौं। लामो समयदेखि फिल्म क्षेत्रबाट अपेक्षाकृत टाढा रहेकी अभिनेत्री बिपना थापा यतिबेला सामाजिक सञ्जालको एउटा पोस्टका कारण चर्चामा छिन्।

उनले सार्वजनिक गरेको एउटा तस्बिरले उनका शुभचिन्तक र फिल्मवृत्तमा नयाँ अड्कलबाजी सुरु गराएको हो ।

बिपनाले सामाजिक सञ्जालमा दुवै बुढीऔँलामा ल्याप्चे लगाएको तस्बिर साझा गरेपछि त्यसको अर्थबारे विभिन्न अनुमान हुन थालेका छन्।

कसैले उनले नयाँ सम्पत्ति खरिद गरेको हुन सक्ने अड्कल गरेका छन् भने कतिपयले वैवाहिक जीवनसँग जोडेर पनि टिप्पणी गरेका छन्। अर्कोतर्फ, धेरैले भने उनी नयाँ फिल्मको तयारीमा रहेको हुन सक्ने अनुमान गरेका छन्।

पछिल्ला केही वर्षयता नेपाली फिल्म उद्योगमा कलाकारहरू स्वयं निर्माण र निर्देशनमा सक्रिय बन्दै गएका छन्।

अभिनेत्रीहरू नीता ढुंगाना, रेखा थापा, प्रियंका कार्कीलगायतले आफ्नै ब्यानरबाट फिल्म निर्माण गरिरहेका बेला बिपना पनि त्यही बाटोमा अघि बढ्न लागेको चर्चा फिल्मवृत्तमा चल्न थालेको छ।