काठमाडौं। अभिनेता नाजिर हुसेनले भारतको नयाँदिल्लीस्थित इन्दिरा गान्धी अन्तर्राष्ट्रिय विमानस्थलमा आफूलाई पटक-पटक छुट्टै सुरक्षा जाँचका लागि रोकिएको भन्दै त्यसको कारण सार्वजनिक गर्न सम्बन्धित निकायसँग माग गरेका छन्।

भारत भ्रमण सकेर नेपाल फर्किने क्रममा आफूलाई दोस्रो पटक पनि अलग कक्षमा लगेर सोधपुछ गरिएको अनुभव उनले सामाजिक सञ्जालमार्फत सार्वजनिक गरेका हुन्।

नाजिर भारतस्थित नेपाली राजदूतावासले आयोजना गरेको कार्यक्रममा सहभागी हुन नयाँदिल्ली पुगेका थिए। उक्त कार्यक्रममा उनको अभिनय रहेको नेपाली चलचित्र ‘गुन्यो चोलो’ को विशेष प्रदर्शन गरिएको थियो। कार्यक्रम सम्पन्न भएपछि नेपाल एयरलाइन्समार्फत काठमाडौं फर्किने क्रममा विमानस्थलमा आफूलाई अन्य यात्रुभन्दा अलग राखेर विस्तृत सोधपुछ गरिएको उनले बताएका छन्।

उनका अनुसार सोही यात्रामा निर्देशक समुद्र भट्ट र जनकदीप पराजुली पनि सँगै थिए। तर उनीहरूलाई कुनै अतिरिक्त जाँच नगरी सहज रूपमा अघि बढ्न दिइयो भने आफूलाई भने छुट्टै कक्षमा लगेर विभिन्न प्रश्न सोधिएको थियो।

नाजिरले सामाजिक सञ्जालमा लेखेअनुसार सुरक्षा अधिकारीहरूले ‘नेपाल किन जाँदै हुनुहुन्छ ?’, ‘तपाईंसँग कति पैसा छ ?’ लगायतका प्रश्न गरेका थिए। उनले आफू नेपाल फर्किरहेको, भारत भ्रमणको उद्देश्य चलचित्र प्रदर्शनमा सहभागी हुनु रहेको तथा आफूसँग भारतीय मुद्रा नरहेको स्पष्ट रूपमा जानकारी गराएको बताएका छन्।

यद्यपि त्यसपछि पनि किन आफूलाई अलग राखेर जाँच गरिएको भन्ने प्रश्न गर्दा सुरक्षा अधिकारीबाट स्पष्ट जवाफ नपाएको उनको गुनासो छ। उनका अनुसार अधिकारीहरूले ‘कोई बात नहीं’ भन्ने छोटो प्रतिक्रिया मात्रै दिएका थिए, जुन आफ्नो प्रश्नको उत्तर हुन नसक्ने उनको भनाइ छ।

नाजिरले यदि आफ्नो पूरा नाम  ‘मोहम्मद नाजिर हुसेन’ भएकै कारण प्रत्येक पटक अतिरिक्त सुरक्षा जाँचको सामना गर्नुपरेको हो भने त्यो स्वीकार्य नहुने बताएका छन्। यदि त्यसो होइन भने वास्तविक कारण सार्वजनिक गरिनुपर्ने उनको माग छ।

उनले राहदानी स्क्यान गरेपछि यात्रुको विवरण प्रणालीमा देखिने भएकाले कुनै विशेष कारण नभई एउटै व्यक्तिलाई पटक-पटक अलग राखेर सोधपुछ गर्नु उचित नहुने धारणा व्यक्त गरेका छन्।

उनका अनुसार यसअघि पनि यस्तै अनुभव भएको थियो। पहिलो पटक सामान्य प्रक्रिया ठानेर बेवास्ता गरे पनि दोस्रो पटक उस्तै व्यवहार दोहोरिएपछि आफूले सार्वजनिक रूपमा प्रश्न उठाउन आवश्यक ठानेको बताएका छन्।

नाजिरको यो अनुभव सार्वजनिक भएपछि सामाजिक सञ्जालमा विभिन्न प्रतिक्रिया आएका छन्। केहीले अन्तर्राष्ट्रिय विमानस्थलमा सुरक्षा जाँच सम्बन्धित देशको आन्तरिक प्रक्रिया हुने टिप्पणी गरेका छन् भने कतिपयले कुनै पनि यात्रुलाई स्पष्ट कारण नदिई पटक–पटक छुट्टै जाँच गर्नु पारदर्शिताको दृष्टिले उचित नहुने बताएका छन्।

यस विषयमा भारतीय विमानस्थल प्रशासन वा सम्बन्धित सुरक्षा निकायले भने हालसम्म कुनै औपचारिक प्रतिक्रिया सार्वजनिक गरेका छैनन्।

उनको पोस्ट :