काठमाडौं। गत शुक्रबारदेखि प्रदर्शनमा आएको नेपाली चलचित्र ‘गौँथली’ सफलतापूर्वक दोस्रो सातामा प्रवेश गरेको छ।

पहिलो सातादेखि नै दर्शकको सकारात्मक प्रतिक्रिया र उत्साहजनक व्यापार गरेको चलचित्रले दोस्रो सातामा आउँदा अझ धेरै शो पाउन सफल भएको छ।

निर्देशक कपिल रिजालका अनुसार चलचित्रको पहिलो साताको आधिकारिक व्यापार विवरण सोमबार चलचित्र विकास बोर्डले सार्वजनिक गर्नेछ। उनले अहिलेसम्म बक्स अफिसको तथ्यांक सार्वजनिक नगर्नुको कारण बोर्डको आधिकारिक विवरणलाई पर्खिएको बताए।

उनले पहिलो साताको व्यापार अपेक्षाभन्दा राम्रो रहेको संकेत गर्दै दर्शकले सोचेकाभन्दा पनि उत्साहजनक बक्स अफिस रिपोर्ट आउने दाबी गरेका छन्।

प्रदर्शनको सुरुवातमा करिब २०० शो पाएको ‘गौँथली’ले अहिले २५० भन्दा बढी शो पाइसकेको छ। अधिकांश हलमा दर्शकको उपस्थिति बढ्दै गएपछि चलचित्रको व्यापार पनि सन्तोषजनक रहेको वितरक पक्षको भनाइ छ। पहिलो दिन औसत रहेको अकुपेन्सी त्यसपछिका दिनमा निरन्तर बढ्दै कतिपय शो हाउसफुलसमेत हुन थालेका छन्।

चलचित्रको प्रचारप्रसारलाई निरन्तरता दिँदै कलाकारसहितको टोली काठमाडौं उपत्यकासँगै विभिन्न जिल्लाका हलमा पुगेर दर्शकसँग प्रत्यक्ष भेटघाट गरिरहेको छ। दर्शकले चलचित्रलाई मौलिक कथावस्तु बोकेको पारिवारिक चलचित्रका रूपमा प्रशंसा गरिरहेका छन्। एउटै परिवारका १०–१५ जनासम्म समूहमा चलचित्र हेर्न आउने क्रम बढेको जनाइएको छ। हलमा विशेषगरी महिला दर्शकको उपस्थिति पुरुषको तुलनामा उल्लेखनीय देखिएको निर्माण पक्षले जनाएको छ।

‘गौँथली’मा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना र लक्ष्मीनाथ तिमिल्सिनालगायत कलाकारको अभिनय रहेको छ।

डा. भोला रिजालको कथामा आधारित चलचित्रको पटकथा तथा संवाद डा. कपिल रिजाल, निश्चल कुँवर, नीरज नेपाल र गिरिराज घिमिरेले संयुक्त रूपमा तयार गरेका हुन्।

घर, परिवार, सम्बन्ध र आत्मीयताको भावनात्मक कथालाई केन्द्रमा राखिएको ‘गौँथली’को वितरण रिच इन्टरटेनमेन्ट, एप्पल इन्टरटेनमेन्ट र एफडीले गरिरहेका छन्।