काठमाडौं। नेपाली चलचित्र उद्योगमा नयाँ परियोजनाको घोषणा गरिएको छ। निर्देशक सञ्जय राईको डेब्यु निर्देशनमा बन्ने चलचित्र ‘एक्का मिस्सी बादशाह’ शनिबार औपचारिक रूपमा घोषणा गरिएको हो।

निर्देशक राईको जन्मदिनको अवसर पारेर काठमाडौंमा आयोजित कार्यक्रममा निर्माण टिमले चलचित्रको शीर्षक, प्रमुख कलाकार तथा प्राविधिक टोली सार्वजनिक गर्दै निर्माण प्रक्रिया अघि बढेको जानकारी दिएको हो।

बेलायत (यूके)मा बसोबास गर्दै आएका सञ्जय राई लामो समयदेखि चलचित्र निर्माण र निर्देशनप्रति रुचि राख्दै आएका थिए। विदेशमा रहे पनि उनले चलचित्र निर्माणसँगको आफ्नो लगावलाई निरन्तरता दिँदै आएका थिए। ‘एक्का मिस्सी बादशाह’ उनको निर्देशकका रूपमा पहिलो चलचित्र हुनेछ। निर्माण पक्षका अनुसार चलचित्रले आधुनिक पुस्ताको सोच, प्रेम, मित्रता, संघर्ष र सफलताको यात्रालाई मुख्य विषय बनाउनेछ।

चलचित्रमा अभिनेत्री सम्राज्ञी आरएल शाह मुख्य भूमिकामा देखिने भएकी छन्। उनी ‘आश’ नामक पात्रमा प्रस्तुत हुनेछिन्। निर्माण टिमले कार्यक्रममै उनको बोल्ड लुक्स सार्वजनिक गर्दै पात्रबारे जानकारी दिएको थियो। केही समयदेखि नेपाली चलचित्रमा कम देखिएकी सम्राज्ञीले आफूलाई मनपर्ने पात्र नपाएकै कारण चलचित्रबाट केही समय टाढा रहेको बताइन्।

उनले ‘एक्का मिस्सी बादशाह’को कथा र आफ्नो पात्रले आफूलाई निकै आकर्षित गरेपछि चलचित्रमा काम गर्न सहमत भएको खुलाइन्। सुरुमा केही अन्योलमा रहे पनि निर्देशकले पात्रको गहिराइ र कथा प्रस्तुत गरेपछि आफ्नो धारणा बदलिएको उनले बताइन्।

सम्राज्ञीका अनुसार चलचित्रमा उनको भूमिका साहसी, निडर, आत्मविश्वासी र परम्परागत ढाँचाभन्दा फरक हुनेछ। उनले भनिन्, “मलाई यो पात्र निकै मन पर्‍यो। स्क्रिप्ट पढेपछि म आफैं आश्चर्यमा परेँ। मेरो पात्र धेरै बोल्ड, साहसी र चुनौतीपूर्ण छ। निर्देशकले मेरो सोचसँग मेल खाने गरी यो पात्र निर्माण गर्नुभएको रहेछ।”

चलचित्रको ट्यागलाइन “कोही जित्छन्, कोही हार्छन्, कोही बादशाह बन्छन्” राखिएको छ। निर्माण पक्षका अनुसार यो ट्यागलाइनले जीवनमा आउने सफलता–असफलता, प्रतिस्पर्धा, महत्वाकांक्षा र संघर्षको कथा प्रस्तुत गर्ने संकेत गर्छ।

निर्देशक सञ्जय राईले चलचित्र विशेषगरी अहिलेको युवापुस्तालाई लक्षित गरेर निर्माण गर्न लागिएको बताए। उनका अनुसार सामाजिक सञ्जालको प्रभाव, प्रेम सम्बन्ध, मित्रता, परिवारको अपेक्षा र जीवनमा आउने उतारचढावलाई आधुनिक शैलीमा प्रस्तुत गरिनेछ।

उनले चलचित्रको कथा दुई साथीको जीवनयात्रामा केन्द्रित रहने जानकारी दिए। बाल्यकालदेखि सँगै हुर्किएका ती पात्रहरूले जीवनका विभिन्न मोडमा भोग्ने चुनौती, सम्बन्धमा आउने परिवर्तन, सपना पूरा गर्ने संघर्ष र समाजले उनीहरूमाथि राख्ने अपेक्षालाई चलचित्रले चित्रण गर्ने निर्देशक राईको भनाइ छ।

निर्माण पक्षका अनुसार चलचित्रमा मोहिनीदेवी राई प्रस्तुतकर्ताको रूपमा रहेकी छन्। सुदीप्ता कार्यकारी निर्माता, एलोन गुरुङ लाइन प्रोड्युसर तथा सुपथ श्रेष्ठ प्रोजेक्ट सुपरभाइजरको भूमिकामा छन्।

प्राविधिक टोलीमा नरेन्द्र मैनाली छायांकन निर्देशकका रूपमा आबद्ध छन् भने संगीत निर्माण निकेश कार्की र रोमन बज्राचार्यले गर्नेछन्। आशिम रानाभाट स्टाइलिस्ट तथा सुनिल शिवभक्ति सम्पादकका रूपमा रहने निर्माण पक्षले जनाएको छ।

चलचित्रको छायांकन आगामी फागुन महिनाबाट सुरु गर्ने तयारी गरिएको छ। निर्माण पक्षका अनुसार बाँकी कलाकार तथा अन्य प्राविधिक सदस्यको विवरण क्रमशः सार्वजनिक गरिनेछ।

कार्यक्रममा कार्यकारी निर्माता सुदीप्ताले ‘एक्का मिस्सी बादशाह’ आफ्नो करियरकै विशेष परियोजना भएको बताइन्। कार्यकारी निर्माताको रूपमा नेपाली चलचित्र क्षेत्रमा पहिलो पटक काम गर्न लागेकाले यो यात्रा आफ्ना लागि उत्साहजनक र चुनौतीपूर्ण दुवै रहेको उनले बताइन्।

यसैबीच निर्माण पक्षले चलचित्रका लागि ‘क्रिश’ र ‘अर्जुन’ नामका दुई मुख्य पुरुष पात्रको खोजी भइरहेको जानकारी दिएको छ। निर्देशक सञ्जय राईका अनुसार ती भूमिकाका लागि खुला अडिसन आह्वान गरिएको छ।

नयाँ प्रतिभालाई अवसर दिने उद्देश्यले अडिसनमार्फत कलाकार छनोट गरिने र अन्य कलाकारको घोषणा पनि आगामी दिनमा गरिने निर्माण टिमले जनाएको छ।