सरकारले अनावश्यक बल प्रयोग गर्यो : आरेन राई 

काठमाडौं । श्रम संस्कृति पार्टीका प्रमुख सचेतक आरेन राईले सुनसरी घटनामा सरकारले अनावश्यक बल प्रयोग गरेको आरोप लगाएका छन्।

राष्ट्रिय स्वतन्त्र पार्टी (रास्वपा) का सभापति रवि लामिछानेले सिंहदरबारमा बोलाएको सर्वदलीय बैठकमा धारणा राख्दै राईले वर्तमान सरकार घटनाप्रति पर्याप्त संवेदनशील हुन नसकेको टिप्पणी गरे। उनले अघिल्लो सरकार यस विषयमा बढी संवेदनशील रहेको दाबी पनि गरे।

‘अहिलेको भन्दा हिजोको सरकार बढी संवेदनशील थियो। आज त्यो संवेदनशीलता देखिएन,’ राईले भने। 

राईले सुरक्षा निकायले बल प्रयोग गर्नु नपर्ने अवस्था रहेको उल्लेख गर्दै त्यसले परिस्थिति थप तनावपूर्ण बनाएको दाबी गरे। साथै, घटनाअघि गुप्तचर संयन्त्र प्रभावकारी रूपमा परिचालन हुन नसकेको भन्दै त्यसको भूमिकामाथि पनि प्रश्न उठाए।

राईले अगाडि थपे, ‘सरकारले बल प्रयोग गर्नु हुँदैनथ्यो। गुप्तचरको भूमिका पनि ठिक देखिएन।’