काठमाडौं। दक्षिण भारतीय अभिनेता अल्लु अर्जुन यतिबेला निर्देशक एट्लीको बहुप्रतीक्षित फिल्म ‘राका’को छायांकनमा व्यस्त छन् ।

फिल्ममा अल्लु अर्जुनसँगै अभिनेत्री दीपिका पादुकोण मुख्य भूमिकामा रहने बताइएको छ ।

फिल्म निर्माण पक्षले अहिलेसम्म कथावस्तु र पात्रबारे धेरै विवरण सार्वजनिक गरेको छैन । तर, पछिल्लो समय यो फिल्म दुई भागमा रिलिज हुने तयारीमा रहेको चर्चा बढेको छ ।

इन्डिया टुडेको रिपोर्टअनुसार फिल्मको कथा दुई फरक समयरेखामा आधारित हुनेछ । यसको एउटा भाग पौराणिक-वैदिक तथा आदिवासी परिवेशमा केन्द्रित हुने बताइएको छ भने अर्को भाग आधुनिक समयको कथामा आधारित रहनेछ ।

रिपोर्टमा बलिउड अभिनेता शाहरूख खानले फिल्ममा क्यामियो भूमिका निर्वाह गर्न सक्ने सम्भावना पनि उल्लेख गरिएको छ । यस्तै, आधुनिक समयको कथामा मृणाल ठाकुर मुख्य अभिनेत्रीका रूपमा देखिन सक्ने तथा ऐतिहासिक भागमा दीपिका पादुकोणसँगै जाह्नवी कपूर र रश्मिका मन्दानाको पनि भूमिका हुन सक्ने चर्चा छ ।

यद्यपि, यीमध्ये कुनै पनि विवरणलाई फिल्म निर्माण टिमले हालसम्म आधिकारिक रूपमा पुष्टि गरेको छैन ।

प्यान–इन्डिया स्तरमा निर्माण भइरहेको ‘राका’लाई ठूलो बजेटको साइफाइ एक्सन फिल्मका रूपमा हेरिएको छ । फिल्ममा व्यापक रूपमा सीजीआई र भीएफएक्स प्रयोग हुने बताइएको छ ।

रिपोर्टअनुसार फिल्मको बजेट करिब १ हजार करोड भारतीय रुपैयाँसम्म पुग्न सक्ने चर्चा छ । ठूलो बजेट र भव्य प्राविधिक प्रस्तुतिका कारण फिल्मले भारतीय सिनेमामा प्रभाव पार्ने अपेक्षा गरिएको छ ।

फिल्म सन् २०२७ मा प्रदर्शनमा आउने अपेक्षा गरिएको छ । तर, निर्माण पक्षले अहिलेसम्म यसको आधिकारिक रिलिज मिति घोषणा गरेको छैन ।