काठमाडौं। अभिनेता अभिषेक खड्का र अभिनेत्री खुशी कार्कीको मुख्य भूमिका रहने नयाँ नेपाली फिल्म ‘पच्चिस पच्चिस’ निर्माण हुने भएको छ। फिल्मको निर्माण सोमबार काठमाडौंमा आयोजित एक कार्यक्रममार्फत घोषणा गरिएको हो।

सुब्रत आचार्यको निर्देशनमा बन्ने फिल्मले युवा पुस्ताको प्रेम, करिअर र मित्रताको कथा प्रस्तुत गर्ने बताइएको छ। निर्देशक आचार्यका अनुसार फिल्मको कथावस्तु अहिलेको जेन–जी पुस्ताको प्रेम सम्बन्ध र स्टार्टअप व्यवसायको परिवेशमा केन्द्रित छ।

कलाकार छनोट पनि कथाको विषयवस्तुलाई ध्यानमा राखेर गरिएको निर्देशक आचार्यले बताएका छन्। उनले कलाकारहरूले आफूलाई दिइएको चरित्रलाई न्याय गर्नेमा विश्वस्त रहेको बताए।

अभिषेकले ‘बेहुली फ्रम मेघौली’ बाट अभिनय यात्रा सुरु गरेका हुन्। उनको मुख्य भूमिका रहेको ‘कुमारी’ ले अपेक्षाअनुसार व्यावसायिक सफलता हासिल गर्न नसके पनि उनको अभिनयले भने प्रशंसा पाएको थियो।

यता, ‘मेरो डान्स युनिभर्स’ मार्फत चर्चामा आएकी खुशी कार्कीले ‘बाह्रगाउँ २’ मा समेत अभिनय गरिसकेकी छन्। थाइल्यान्डमा हुर्किएकी खुशीले नेपाली फिल्ममा आफ्नो अभिनय यात्रा अघि बढाइरहेकी छन्।

‘पच्चिस पच्चिस’ मार्फत अभिषेक र खुशी पहिलोपटक मुख्य जोडीका रूपमा पर्दामा देखिनेछन्।