काठमाडौं। नेपाल फार्मेसी परिषद्को अध्यक्षमा डा. कादिर आलम नियुक्त भएका छन्।

नियुक्तिपछि आलमले स्वास्थ्य तथा खाद्य स्वच्छतामन्त्री निशा मेहताको उपस्थितिमा पद तथा गोपनीयताको शपथ लिएका छन्।

मन्त्री मेहताको स्वकीय सचिवालयका अनुसार परिषद्को अध्यक्ष पदका लागि आवेदन दिएका उम्मेदवारमध्ये छनोट प्रक्रिया पूरा गरेपछि आलमलाई अध्यक्षमा नियुक्त गरिएको हो।

शपथग्रहणपछि मन्त्री मेहताले परिषद्को कामलाई थप प्रभावकारी र पारदर्शी बनाउन नवनियुक्त अध्यक्षलाई आग्रह गरेकी छन्। परिषद्ले आफ्नो जिम्मेवारी निर्वाह गर्दा उत्तरदायित्व र व्यावसायिक नियमनलाई प्राथमिकतामा राख्नुपर्ने उनको भनाइ छ।

मन्त्री मेहताले औषधि सेवा तथा फार्मेसी शिक्षाको गुणस्तर सुधार, पेसागत नियमनलाई प्रभावकारी बनाउने तथा आम नागरिकमा फार्मेसी क्षेत्रप्रतिको विश्वास बढाउने गरी परिषद्ले काम गर्नुपर्नेमा जोड दिएकी छन्।

नवनियुक्त अध्यक्ष आलमले परिषद्को जिम्मेवारी सम्हाल्दै फार्मेसी क्षेत्रसँग सम्बन्धित विषयमा प्रभावकारी नियमन र संस्थागत सुधारमा ध्यान दिने अपेक्षा गरिएको छ।