काठमाडौं। अस्पतालको वाइफाई प्रयोग गरेको विषयमा विवाद हुँदा स्वास्थ्यकर्मीमाथि कुटपिट गरेको आरोपमा कालिकोट प्रहरीले तीन जनालाई पक्राउ गरेको छ।

पलाँता गाउँपालिका–९ स्थित पलाँता अस्पतालमा कार्यरत चिकित्सक तथा नर्समाथि दुर्व्यवहार, अभद्र व्यवहार र कुटपिट गरेको तथा अस्पतालमा अनधिकृत रूपमा प्रवेश गरी सामान तोडफोड गरेको आरोपमा तीन जनालाई नियन्त्रणमा लिइएको जिल्ला प्रहरी कार्यालय कालिकोटले जनाएको छ।

प्रहरीका अनुसार शुक्रबार दिउँसो करिब १ बजेतिर १४ र १५ वर्षका एकाघरका दुई भाइ अस्पतालको वाइफाईमा मोबाइल जोडेर ओपीडी नजिकै गेम खेलिरहेका थिए। चिकित्सकले अस्पताल परिसरबाहिर गएर मोबाइल चलाउन भनेपछि उनीहरू र चिकित्सकबीच विवाद भएको थियो।

विवाद बढ्दै गएपछि बालकहरूका परिवारका अन्य सदस्यसमेत घटनामा जोडिएको र चिकित्सक तथा नर्समाथि हातपात भएको प्रहरीको भनाइ छ। त्यसक्रममा अस्पतालमा केही सामानसमेत तोडफोड भएको जनाइएको छ।

जिल्ला प्रहरी कार्यालय कालिकोटले घटनामा संलग्न तीन जनालाई नियन्त्रणमा लिएर अनुसन्धान अघि बढाएको जनाएको छ।

जिल्ला प्रहरी कार्यालय कालिकोटका सूचना अधिकारी सुरेश खत्रीका अनुसार स्वास्थ्यकर्मीमाथि भएको दुर्व्यवहार तथा अस्पतालमा अनधिकृत प्रवेश गरी तोडफोड गरेको घटनाबारे थप अनुसन्धान भइरहेको छ।

अस्पतालजस्तो संवेदनशील क्षेत्रमा सामान्य विवादले स्वास्थ्यकर्मीमाथि हातपात तथा भौतिक क्षतिसम्मको अवस्था सिर्जना भएपछि घटनालाई गम्भीर रूपमा लिइएको प्रहरीले जनाएको छ।