काठमाडौं । जेनजी अभियन्ता रविकिरण हमालले लोकसेवा आयोगको विज्ञापन स्थगित गर्ने सरकारको निर्णयले लाखौँ विद्यार्थीको भविष्य अन्योलमा परेको भन्दै तत्काल निर्णय सच्याउन माग गरेका छन्। उनले लोकसेवा तयारी गरिरहेका विद्यार्थी आन्दोलनमा उत्रिनुपर्ने अवस्था सिर्जना हुनु नै दुःखद् भएको बताए।

अनामनगरस्थित नेसनल प्रेस क्लब नेपालको कार्यालयमा आयोजित ‘लोकसेवा अध्ययनरत विद्यार्थीको पत्रकार सम्मेलन’ मा बोल्दै हमालले सामान्यतया आन्दोलनबाट टाढा रहने लोकसेवा तयारी गरिरहेका विद्यार्थीसमेत आफ्नो भविष्यका लागि आन्दोलित हुनुपर्ने अवस्था आएको बताए।

‘नेपालमा आन्दोलन नगर्ने मान्छे लोकसेवाका विद्यार्थी हुन्। सरकारका निकायमा जानुपर्छ भनेर उनीहरू आन्दोलनमा सहभागी हुँदैनन्। नसुतेर बिहानदेखि साँझसम्म पढ्ने विद्यार्थी आन्दोलित बनिरहेका छन्,’ उनले भने।

रोजगारी नागरिकको मौलिक अधिकार भएको उल्लेख गर्दै हमालले सरकारले लोकसेवा तयारी गरिरहेका विद्यार्थीको भविष्य अन्योलमा पार्न नहुने बताए। उनले विद्यार्थीले राखेका माग तत्काल सम्बोधन गर्न सरकारसँग आग्रह गरे।

सरकारको नेतृत्व गरिरहेका प्रधानमन्त्री बालेन्द्र शाह र गृहमन्त्री सुदन गुरुङप्रति प्रश्न उठाउँदै हमालले युवाको आवाज नसुने परिणाम गम्भीर हुनसक्ने चेतावनी दिए।

‘को हुन् बालेन शाह? को हुन् सुदन गुरुङ? युवाहरूको आवाज सुन्नुपर्दैन? हिजो केपी ओली र रमेश लेखकले युवाको आवाज नसुन्दा के भयो? त्यसैगरी लाखौँ विद्यार्थी सडकमा आए के हुन्छ?’ उनले प्रश्न गरे।

भदौ २३ र २४ गतेको युवा आन्दोलनपछि बनेको सरकारले समेत युवाका माग नसुन्नु विडम्बना भएको उनको भनाइ थियो। युवाको आन्दोलनबाट सरकार बनेको दाबी गरिँदै आएको अवस्थामा उनीहरूकै मागलाई बेवास्ता गर्न नहुने उनले बताए।

‘भदौ २३ र २४ गते युवाहरूको आन्दोलनबाट आएको सरकारले युवाहरूको कुरा सुन्नुपर्दैन? सरकारले युवाको आवाज सुन्नुपर्छ, युवाहरूका माग सुन्नुपर्छ,’ हमालले भने।

लोकसेवा तयारी गर्ने विद्यार्थीले कठिन संघर्ष गरेर अध्ययन गर्ने गरेको उल्लेख गर्दै उनले उनीहरूको भविष्यमा प्रतिकूल असर पर्ने निर्णयविरुद्ध सबै एकजुट हुनुपर्ने बताए।

हमालले प्रधानमन्त्री शाहको सचिवालयमा ठूलो संख्यामा मानिस नियुक्त गरिएको विषयमा समेत प्रश्न उठाए। उनले सचिवालयमा रहेका व्यक्तिहरूको योग्यता र नियुक्तिको आधारबारे प्रश्न गर्दै लोकसेवा तयारी गरिरहेका विद्यार्थीको योग्यता र क्षमताको अवमूल्यन गर्न नहुने बताए।

‘बालेन शाहले २७ जना मानिस सचिवालयमा राखेका छन्। को हुन् ती मानिसहरू? अनुशासित छन् तिनीहरू? अध्ययन गरेका छन् तिनीहरूले? लोकसेवा पढेका विद्यार्थी जस्ता छन् तिनीहरू?’ उनले प्रश्न गरे।

लोकसेवा तयारी गरिरहेका विद्यार्थी अहिलेका मन्त्री तथा सांसदभन्दा समेत योग्य हुनसक्ने दाबी गर्दै उनले राज्यका विभिन्न निकायमा नियुक्ति गर्दा योग्यता र क्षमतालाई प्राथमिकता दिनुपर्ने बताए।

हमालले मुलुकका विभिन्न क्षेत्रमा देखिएका समस्या समाधान गर्न सरकार असफल भइरहेको आरोपसमेत लगाए। पासपोर्ट बनाउन लाइन बस्नुपर्ने, खाना पकाउने ग्यासका लागि लामो लाइन लाग्नुपर्ने तथा विभिन्न ठाउँमा नागरिकका समस्या बढ्दै गएको उल्लेख गर्दै उनले सरकारको कार्यशैलीमाथि प्रश्न उठाए।

संसदको भूमिकामाथि समेत प्रश्न उठाउँदै उनले नागरिकका समस्या समाधान गर्न सरकार र संसद गम्भीर हुनुपर्ने बताए।

‘अहिलेको संसदको काम के हो? तलब खान मात्रै हो? यस्तै गर्नलाई आन्दोलन गरेको हो? यस्तै हुन्छ भनेर निर्वाचन गरेको हो? नागरिकका समस्या समाधान गर्नुपर्दैन?’ उनले प्रश्न गरे।

सरकारभित्रै नीतिगत एकरूपता नरहेको आरोप लगाउँदै हमालले प्रधानमन्त्रीले एउटा कुरा र अर्थमन्त्रीले अर्को कुरा गर्ने अवस्था देखिएको बताए। निर्वाचनमा प्राप्त मतको दम्भ नदेखाउन चेतावनी दिँदै उनले जनताको समर्थन स्थायी नहुने भन्दै विगतका सरकारबाट पाठ सिक्न आग्रह गरे।

‘सरकारमा नै एकरूपता छैन। प्रधानमन्त्रीले एउटा कुरा गर्छन्, अर्थमन्त्रीले अर्को कुरा गर्छन्। मतको दम्भ नदेखाए हुन्छ। मत हिजो केपी ओलीले पनि पाएका थिए। के भयो?’ उनले भने।

सरकारले सबै क्षेत्रलाई अस्तव्यस्त बनाउँदै लगे त्यसको परिणाम वर्तमान नेतृत्वले समेत भोग्नुपर्ने उनको चेतावनी थियो।

उनले विगतका आन्दोलन र त्यसक्रममा भएका घटनाको प्रसंग उठाउँदै वर्तमान सरकारले युवाको मागलाई गम्भीर रूपमा लिनुपर्ने बताए। साथै, लोकसेवा तयारी गरिरहेका लाखौँ विद्यार्थीको माग तत्काल सम्बोधन गर्न सरकारसँग आग्रह गरे।

हमालले युवाहरूको मागलाई निरन्तर बेवास्ता गरिए फेरि ठूलो आन्दोलन हुनसक्ने चेतावनीसमेत दिए।

‘युवाहरूलाई यसरी नै हेपिराख्यो भने फेरि पनि सिंहदरबार कब्जा हुन सक्छ,’ उनले चेतावनी दिए।