काठमाडौं। समिर भट्टको मुख्य भूमिका रहेको बहुप्रतीक्षित नेपाली फिल्म ‘१२ गाउँ २’ आगामी असोज ३० गतेबाट प्रदर्शनमा आउने तयारीमा छ। दसैँको अवसर पारेर फूलपातीको अघिल्लो दिन फिल्म प्रदर्शनमा ल्याउन लागिएको हो।

‘१२ गाउँ २’ सन् २०२४ मा प्रदर्शनमा आएको सफल फिल्म ‘१२ गाउँ’को सिक्वेल हो। एक्सन अभिनेता विराज भट्टको निर्देशनमा बनेको पहिलो श्रृंखलाबाट समिर भट्ट नेपाली फिल्म क्षेत्रमा उदाउँदो स्टारका रूपमा स्थापित भएका थिए। पहिलो फिल्मको सफलतासँगै समिरको बढ्दो लोकप्रियताका कारण ‘१२ गाउँ २’लाई दर्शकमाझ प्रतीक्षित फिल्मका रूपमा हेरिएको छ।

फिल्मको निर्देशन विराज भट्टले गरेका हुन्। फिल्ममा विराज भट्ट, समिर भट्ट, अनुपविक्रम शाही, काफिया शाही, वर्षा इटनी, खुशी कार्की, प्रकाश शाह, सुनिल पोखरेल, कालु राना, पुष्कर भट्ट, शिवकुमार सिंह, साहित सिंह ठकुरी, पूर्णबहादुर गन्धर्वलगायत कलाकारको अभिनय रहेको छ।

सन्तोष सरकारको कथा तथा पटकथा रहेको फिल्ममा महेश पौडेलको छायांकन छ। त्यस्तै, स्टन्ट सिल्भा र शंकर महर्जनले द्वन्द्व निर्देशन गरेका छन् भने कालाचरण र गीता गुरप्पाको ब्याकग्राउन्ड म्युजिक तथा सियोन श्रेष्ठको नृत्य निर्देशन रहेको छ।

दसैँको माहोललाई लक्षित गर्दै प्रदर्शनमा आउन लागेको ‘१२ गाउँ २’बाट निर्माण पक्षले पहिलो श्रृंखलाको सफलता दोहोर्‍याउने अपेक्षा गरेको छ।