काठमाडौं। देशभरका स्वास्थ्य विज्ञान प्रतिष्ठानमा शिक्षाध्यक्ष, डीन र रजिस्ट्रारलगायत पदाधिकारी नियुक्तिका लागि प्रतिष्ठानअनुसार फरक-फरक मापदण्ड तय गरिएको पाइएको छ।

यसले पदाधिकारी छनोटमा एकरूपता, प्रतिस्पर्धा र वस्तुनिष्ठतामाथि प्रश्न उठाएको छ।

राप्ती, पाटन, चिकित्सा विज्ञान राष्ट्रिय, कर्णाली, बीपी कोइराला र पोखरा स्वास्थ्य विज्ञान प्रतिष्ठानले आ-आफ्नै कार्यविधि बनाएर पदाधिकारी नियुक्ति प्रक्रिया अघि बढाएका छन्। अधिकांश प्रतिष्ठानले आवेदनसमेत आह्वान गरिसकेका छन्।

योग्यताका मापदण्डमा भने ठूलो अन्तर देखिन्छ। पाटन स्वास्थ्य विज्ञान प्रतिष्ठानमा शिक्षाध्यक्षका लागि सहप्राध्यापक तहमा कम्तीमा पाँच वर्षको अनुभव र प्राध्यापक पदको योग्यता तोकिएको छ। बीपी कोइराला स्वास्थ्य विज्ञान प्रतिष्ठानमा शिक्षाध्यक्षका लागि प्राध्यापक तहमा पाँच वर्षको अनुभव वा स्वास्थ्य सेवाको १०औँ तहभन्दा माथि कम्तीमा आठ वर्षको अनुभव आवश्यक छ।

चिकित्सा विज्ञान राष्ट्रिय प्रतिष्ठानमा शिक्षाध्यक्षका लागि प्राध्यापक तहमा पाँच वर्ष काम गरेको र कुल आठ वर्षको प्राध्यापन अनुभव मागिएको छ। तर राप्ती स्वास्थ्य विज्ञान प्रतिष्ठानमा शिक्षाध्यक्ष र डीनका लागि प्राध्यापक पदमा एक वर्षको अनुभव भए पुग्ने व्यवस्था गरिएको छ।

रजिस्ट्रारको हकमा पनि यस्तै असमानता देखिन्छ। बीपी कोइराला स्वास्थ्य विज्ञान प्रतिष्ठानले सहप्राध्यापक तहमा पाँच वर्षको अनुभव वा १०औँ तहमा आठ वर्षको अनुभव अनिवार्य गरेको छ। पाटनमा सहायक प्राध्यापक वा सोभन्दा माथि पाँच वर्षको अनुभव वा अधिकृत तहमा १० वर्षको अनुभव मागिएको छ।

राप्ती स्वास्थ्य विज्ञान प्रतिष्ठानमा भने सहप्राध्यापक तहमा एक वर्षको अनुभव वा राजपत्राङ्कित द्वितीय श्रेणीमा पाँच वर्ष काम गरेको व्यक्ति पनि रजिस्ट्रारका लागि योग्य हुने व्यवस्था छ।

प्रतिष्ठानअनुसार योग्यता र अनुभवको सीमा यति फरक राखिएपछि समान प्रकृतिका शैक्षिक तथा प्रशासनिक पदमा नियुक्तिको मापदण्ड किन एकरूप हुन सकेन भन्ने प्रश्न उठेको छ।