काठमाडौं । निर्देशक सुदर्शन थापाको निर्देशनमा नयाँ नेपाली फिल्म ‘शुभ विवाह’ निर्माण हुने भएको छ। निर्माण पक्षले बिहीबार पत्रकार सम्मेलनमार्फत फिल्मका कलाकार तथा प्राविधिक टोली सार्वजनिक गरेको हो।

प्रियादर्शन फिल्म्सको ब्यानरमा बन्ने फिल्ममा प्रदीप खड्का र सनिशा भट्टराई मुख्य भूमिकामा रहनेछन्। उनीहरूसँगै हरिहर शर्मा, वसुन्धरा भुसाल, मुकुन्द किशोर भट्टराई, कृष्ण ढुङ्गाना, विशाल पहारी, अंशु महर्जनलगायत कलाकारको अभिनय रहनेछ।

निर्देशक थापा र अभिनेता खड्काले यसअघि सफल फिल्म ‘प्रेम गीत’मा सहकार्य गरेका थिए।

सुप्रिया कटवालको निर्माण र साम भुजेलको कार्यकारी निर्माण रहने फिल्मको कथा प्रदीप श्रीवास्तव तथा पटकथा–संवाद रामशरण पाठकले लेखेका हुन्। संगीत अर्जुन पोखरेलको रहनेछ भने छायांकन राजेश श्रेष्ठ र सम्पादन मिलन श्रेष्ठले गर्नेछन्।

रोमान्टिक कथामा आधारित फिल्मको छायांकन चाँडै सुरु गर्ने तयारी निर्माण पक्षको छ। फिल्म आगामी फागुन २१ गतेदेखि प्रदर्शनमा आउने घोषणा गरिएको छ।