काठमाडौं । राजकुमार सन्तोषी निर्देशित भारतीय फिल्म ‘बटवारा १९४७’ नेपालमा शुक्रबार साँझदेखि प्रदर्शनमा आउने भएको छ।

केन्द्रीय चलचित्र जाँच समितिले बिहीबार केही दृश्य हटाएर प्रदर्शनका लागि अनुमति दिएपछि फिल्मको रिलिजलाई लिएर विवाद उत्पन्न भएको थियो।

समितिले हटाउन भनेका दृश्य काट्न नसकिने भन्दै नेपाल वितरक ब्यांकटेस इन्टरटेनमेन्टका प्रमुख मनोज राठीले प्रतिक्रिया दिएपछि शुक्रबार बिहानदेखि फिल्म प्रदर्शनमा आउन सकेको थिएन। त्यसपछि फिल्मको नेपाल प्रदर्शन अनिश्चित बनेको थियो।

तर पछिल्लो सहमतिपछि फिल्म नेपालका हलमा शुक्रबार साँझदेखि प्रदर्शनमा आउने भएको राठीले बताएका छन्। उनका अनुसार फिल्मलाई कुनै दृश्य काटछाँट नगरी प्रदर्शनमा ल्याइनेछ।

यद्यपि सेन्सर समितिका सदस्य मनोज पण्डितले भने समितिले फिल्मका केही दृश्य हटाउन स्पष्ट निर्देशनसहित प्रदर्शनको अनुमति दिएको बताएका छन्। उनका अनुसार समितिले हटाउनुपर्ने दृश्यहरू लिखित रूपमा उल्लेख गरेर वितरकलाई उपलब्ध गराएको थियो।

‘हामीले स्पष्ट लेखेर यो–यो दृश्य हटाउने भनेर दिएका छौँ। अन्य कुरा थाहा भएन,’ पण्डितले भने।

फिल्मको प्रदर्शनलाई लिएर वितरक र सेन्सर समितिको भनाइ भने फरक देखिएको छ। वितरकले कुनै दृश्य नहटाई फिल्म प्रदर्शनमा ल्याउने बताएका छन् भने समितिले भने आफूले निश्चित दृश्य हटाउने सर्तसहित प्रदर्शन अनुमति दिएको दाबी गरेको छ।

‘बटवारा १९४७’ भारत विभाजनको पृष्ठभूमिमा निर्माण भएको फिल्म हो। फिल्मले विभाजनका क्रममा सर्वसाधारणले भोग्नुपरेको पीडा, विस्थापन, आघात र कठिन परिस्थितिको कथा प्रस्तुत गर्छ।

फिल्ममा सनी देओल, प्रीति जिन्टा, शबाना आजमी, करण देओल, अली फजल र अभिमन्यु सिंहलगायत कलाकारको मुख्य भूमिका रहेको छ।

लामो समयपछि अभिनेत्री प्रीति जिन्टा यसै फिल्ममार्फत ठूलो पर्दामा फर्किएकी छन्। फिल्मलाई लिएर भारतमा समेत विभाजनको ऐतिहासिक घटनालाई प्रस्तुत गरिएको विषयले चर्चा पाएको छ।

नेपालमा भने सेन्सर प्रक्रिया र दृश्य हटाउने विषयमा विवाद भएपछि निर्धारित समयभन्दा ढिला प्रदर्शनमा आउन लागेको हो।

पछिल्लो निर्णयसँगै शुक्रबार साँझबाट फिल्म नियमित प्रदर्शनमा आउने वितरकले जनाएको छ।