काठमाडौं। राजु श्रेष्ठको निर्देशनमा बन्न लागेको नेपाली फिल्म ‘कंगाल करोडपति’मा अभिनेत्री रक्षा थापा र अभिनेता मञ्जिलकुमार थपिएका छन्।

दुई कलाकारको अनुबन्धसँगै फिल्मको कलाकार टोली थप विस्तार भएको छ।

यसअघि फिल्ममा मुकुन भुसाल, सलिना तामाङ र रेयर राई आबद्ध भइसकेका छन्। निर्माण पक्षले अन्य कलाकारको छनोट प्रक्रिया पनि अघि बढाइरहेको जनाएको छ।

रक्षाले फिल्म बाटो’बाट अभिनयमा डेब्यु गरेकी हुन्। उनको पछिल्लो प्रदर्शन भएको फिल्म ‘बेहुली फ्रम मेघौली’ हो। उनी अभिनीत अर्को फिल्म ‘मास्टर्नी’ पनि प्रदर्शनको तयारीमा छ।

अभिनेता मञ्जिलकुमारले भने ‘कोसेढुङ्गा’बाट नेपाली फिल्ममा प्रवेश गरेका हुन्।

सिनेमा पाठशाला प्रालिको ब्यानरमा निर्माण हुने फिल्मको कथा तथा पटकथा सुमन गजमेरले तयार पारेका हुन्। निर्माण टोली अहिले कलाकार छनोटसँगै छायांकनको तयारीमा जुटेको छ।

फिल्मका प्रस्तुतकर्ता प्रवीण आचार्य र निर्माता अनिलकुमार बुढाथोकी हुन्। छिरिङ तामाङ, प्रवीण राई र प्रवेश सापकोटा सहनिर्माताका रूपमा जोडिएका छन्।

रीता श्रेष्ठ तामाङ र सुरज कुमार लाइन प्रोड्युसरको जिम्मेवारीमा छन्।