काठमाडौं। नेपाल मेडिकल काउन्सिलको अध्यक्षमा प्रा.डा. ढुण्डीराज पौडेल नियुक्त भएका छन्।

नवनियुक्त अध्यक्ष पौडेलले बुधबार स्वास्थ्य तथा जनसङ्ख्यामन्त्री निशा मेहतासमक्ष पद तथा गोपनीयताको शपथ ग्रहण गरेका छन्।

पौडेल वरिष्ठ नाक, कान तथा घाँटी विशेषज्ञ हुन्। उनी हाल नेपालगन्ज मेडिकल कलेज, कोहलपुरमा नाक, कान तथा घाँटी विभाग प्रमुख तथा प्राध्यापकका रूपमा कार्यरत छन्।

यसअघि उनले वीर अस्पताल, भेरी अस्पताल, भरतपुर अस्पताल र दाङ अस्पतालमा विभिन्न जिम्मेवारीमा रहेर सेवा गरेका थिए।

पौडेलले त्रिभुवन विश्वविद्यालयअन्तर्गत चिकित्सा शास्त्र अध्ययन संस्थानबाट नाक, कान तथा घाँटी शल्य चिकित्सामा एमएस तहको अध्ययन गोल्ड मेडलसहित पूरा गरेका हुन्। उनले सोही संस्थानबाट एमबीबीएस अध्ययन गरेका थिए।

चिकित्सा क्षेत्रमा लामो अनुभव भएका पौडेलले नेपाल मेडिकल काउन्सिलमै नैतिकता तथा परीक्षा समितिको कार्यकारी सदस्य र समन्वयकर्ताका रूपमा समेत जिम्मेवारी सम्हालिसकेका छन्।

काउन्सिलको अध्यक्षका रूपमा उनको कार्यकालमा चिकित्सकको दर्ता तथा लाइसेन्स, परीक्षा प्रणाली, चिकित्सा शिक्षाको गुणस्तर र चिकित्सकीय आचारसंहिताको प्रभावकारी कार्यान्वयनलगायत विषय प्रमुख जिम्मेवारीका रूपमा रहनेछन्।