वर्षौंदेखि देशका सामुदायिक विद्यालयको गुणस्तर सुधारको नाममा कागजमा लाखौंको योजना बन्छन्, भाषण छाँटिन्छन् तर धरातलीय यथार्थ के छ रु अब यसको छिनोफानो गर्न शिक्षा तथा खेलकुदमन्त्री सस्मित पोखरेल आफैं मैदानमा निस्किएका छन् ।

फाइल र एसीको हावा खाने सिंहदरबारको कुर्सीमा अल्मलिएको मन्त्रालय यसपटक भने सीधै माटो र धुलो उड्ने कक्षाकोठामा पुगेको छ । मन्त्री सस्मित पोखरेलले  काडमाडौँका विभिन्न  सामुदायिक विद्यालयहरुमा आकस्मिक छड्के निरीक्षण गरिरहेका छन् ।  अनुगमनका क्रममा अधिकांश विद्यालयहरूमा चरम लापरबाही, भौतिक संरचनाको बेहाल र शिक्षकहरूको गैरजिम्मेवारपन  देखिएको पाइएको छ । विद्यार्थीहरू गुणस्तरीय शिक्षा पाउनबाट वञ्चित हुँदा पनि विद्यालय प्रशासन भने कागजी प्रगति प्रतिवेदन देखाएर बस्ने गरेको तितो सत्य मन्त्रीको सामुन्ने आएको छ ।

विद्यार्थी र शिक्षकहरूसँग प्रत्यक्ष सम्वाद गर्दै मन्त्री पोखरेलले भित्री समस्याहरूको फेहरिस्त निकालेका छन्  । किताब नपाएका गुनासा, भत्किएका छाना र शौचालयको दयनीय अवस्था देखेपछि उनले अब कुनै पनि बहानाबाजी नचल्ने कडा चेतावनी दिएका छन् ।

मन्त्रीको यो कदमले वर्षौंदेखि सुतेको शिक्षा मन्त्रालयलाई त झक्झकाएको छ नै, साथै लापरबाही गर्ने विद्यालय प्रशासनलाई पनि तताएको  छ । अब यो अनुगमन राजधानीमा मात्र सीमित हुन्छ वा देशैभर पुग्छ त्यो आगामी दिनमा मन्त्रालयले चाल्ने एक्सनले नै स्पष्ट पार्नेछ ।