काठमाडाैं। वर्षायाम सुरु भएसँगै झापामा जापानिज इन्सेफ्लाइटिस (जेई) संक्रमण तीव्र रूपमा फैलिन थालेको छ। संक्रमणका कारण पछिल्लो एक सातामा मेचीनगर-८ की ६४ वर्षीया महिलाको मृत्यु भएपछि चालु वर्ष जिल्लामा जेईबाट ज्यान गुमाउनेको संख्या ६ पुगेको हो।

स्वास्थ्य कार्यालय झापाका अनुसार हालसम्म जिल्लामा ११ जनामा जेई संक्रमण पुष्टि भएको छ। मृत्यु हुनेमा चार महिला र दुई पुरुष रहेका छन्। मेचीनगरमा दुई जनाको मृत्यु भएको छ भने हल्दिबारी, बाह्रदशी, बिर्तामोड र अर्जुनधारामा एक-एक जनाको ज्यान गएको कार्यालयले जनाएको छ।

संक्रमितमध्ये दुई जना अहिले उपचाररत छन् भने तीन जना उपचारपछि घर फर्किसकेका छन्। संक्रमणको फैलावट हेर्दा मेचीनगर सबैभन्दा बढी प्रभावित क्षेत्रका रूपमा देखिएको छ। त्यहाँ मात्रै पाँच जनामा संक्रमण पुष्टि भएको छ। बिर्तामोडमा दुई तथा हल्दिबारी, बाह्रदशी, कचनकवल र अर्जुनधारामा एक-एक जनामा संक्रमण देखिएको छ।

स्वास्थ्य कार्यालय झापाका प्रमुख वृजकुमार दासका अनुसार जेईबाट संक्रमित हुनेमध्ये अधिकांश ५० वर्षभन्दा माथिका छन्। यद्यपि यो संक्रमण वृद्धवृद्धामा मात्रै सीमित नरहेको उनको भनाइ छ। संक्रमितमध्ये सात महिनाका एक शिशु र ४० वर्षीय एक व्यक्ति पनि छन्।

वर्षायाममा लामखुट्टेको संख्या बढेसँगै जेई संक्रमणको जोखिम पनि बढ्ने गरेको स्वास्थ्यकर्मीहरू बताउँछन्। विशेषगरी ग्रामीण तथा कृषि क्षेत्रमा बसोबास गर्ने नागरिक लामखुट्टेको टोकाइबाट बढी जोखिममा पर्ने गरेका छन्।

जिल्लामा संक्रमण पुष्टि हुने र मृत्यु हुनेको संख्या बढ्दै गएपछि स्वास्थ्यकर्मीहरूले सावधानी अपनाउन आग्रह गरेका छन्। उमेरका हिसाबले मात्रै नभई विभिन्न स्थानीय तहमा संक्रमण फैलिएको तथ्यले पनि जेईलाई सामान्य रूपमा लिन नहुने देखिएको छ। लामखुट्टेको टोकाइबाट जोगिन व्यक्तिगत तथा घरायसी सरसफाइमा ध्यान दिनुका साथै जोखिमयुक्त क्षेत्रमा विशेष सतर्कता अपनाउन स्वास्थ्यकर्मीहरूको सुझाव छ।