काठमाडौं। श्रम संस्कृति पार्टीकी सांसद अम्बिकादेवी सङ्ग्रौलाले सरकारको आर्थिक नीति र चालु आर्थिक वर्षको बजेट कार्यान्वयनप्रति प्रश्न उठाउँदै यसको कमजोरी सुरुवाती महिनामै देखिन थालेको दाबी गरेकी छन् ।

सोमबार बसेको प्रतिनिधिसभा बैठकमा बोल्दै उनले बैंकिङ प्रणालीमा पर्याप्त रकम उपलब्ध भए पनि निजी क्षेत्रले कर्जा लिएर लगानी गर्न उत्साह नदेखाएको विषयलाई सरकारप्रतिको आर्थिक विश्वाससँग जोडिन् ।

उनका अनुसार बैंकमा ऋण दिन सक्ने अवस्था हुँदाहुँदै व्यवसायी लगानीका लागि अघि नबढ्नु सामान्य वित्तीय समस्या मात्र नभई सरकारको नीतिप्रति निजी क्षेत्र विश्वस्त हुन नसकेको संकेत हो ।

सङ्ग्रौलाले अर्थमन्त्री डा. स्वर्णिम वाग्लेमाथि समेत व्यंग्य गर्दै बाह्य मुलुकको अनुभव भए पनि नेपालको अर्थतन्त्रको वास्तविक अवस्था बुझ्न नसकेको आरोप लगाइन् ।

‘अर्थमन्त्रीज्यूले ३६ देश चिन्नुभएको भनेर सत्तापक्षका माननीयहरू भन्नुहुन्छ,’ उनले संसद्मा भनिन्, ‘तर ३६ देश चिने पनि आफ्नै देशलाई चिन्न सक्नुभएन । उहाँले ल्याएको बजेटको असफलता पहिलो महिना सकिँदै देखिन थाल्यो ।’

उनले नेपालको अर्थतन्त्रमा अहिले देखिएका समस्या गम्भीर रहेको दाबी गर्दै सरकारको आर्थिक व्यवस्थापनमाथि समेत प्रश्न उठाइन् ।

सांसद सङ्ग्रौलाले वर्तमान सरकार गठन भएयता पुँजीबजारमा ठूलो रकम घटेको दाबी पनि गरिन् । उनका अनुसार करिब ६ खर्ब रुपैयाँ बराबरको पुँजीबजार मूल्य घटिसकेको छ ।

पुँजीबजारको समस्या समाधानतर्फ पर्याप्त ध्यान दिनुको साटो अर्थमन्त्री अन्य विषयमा केन्द्रित भएको आरोप लगाउँदै उनले सरकारलाई आर्थिक क्षेत्र सुधारमा गम्भीर बन्न आग्रह गरिन् ।

उनले बैंकिङ प्रणालीमा रहेको तरलतालाई उत्पादनमूलक क्षेत्रमा परिचालन गर्न नसक्नु सरकारको आर्थिक नीतिको प्रमुख कमजोरी भएको बताइन् । लगानीको वातावरण निर्माण गर्न नसके अर्थतन्त्रमा रहेको पैसा बैंकमै थन्किएर बस्ने र त्यसको प्रत्यक्ष असर आर्थिक गतिविधिमा पर्ने उनको भनाइ थियो ।

सरकारसँग संसद्मा बलियो बहुमत भए पनि आर्थिक क्षेत्रमा जनविश्वास सिर्जना गर्न नसकेको सङ्ग्रौलाको आरोप छ । उनले बजेटका लक्ष्य पूरा गर्न निजी क्षेत्रको विश्वास जित्ने गरी नीति तथा कार्यक्रम कार्यान्वयन गर्न सरकारको ध्यानाकर्षण गराइन् ।