काठमाडौं। राजतन्त्र फर्काउने र हिन्दुराष्ट्र पुनःस्थापना गर्ने भन्दा पूर्वराजा ज्ञानेन्द्र शाहले नै नपत्याएका र कुनैबेला गणतन्त्रवादी नेता प्रचण्डको सरकारमा गएका राजेन्द्र लिङ्देन गम्भीर संकटमा फस्दै गएका छन्।

उनले सोमबार बागमती प्रदेशका सभामुख भुवन पाठकलाई राप्रपाका तीन सांसदलाई पदमुक्त गर्न आग्रह गर्दै पठाएको पत्रलाई नेता कमल थापाले ‘फेक’ भनेका छन्। यससँगै राप्रपामा लिङ्देन–थापाबीच लफडा सुरु भएको हो।

लिङ्देनले सोमबार बागमतीका राप्रपा सांसदहरू राजु विष्ट, गिरबहादुर तामाङ र राजेन्द्र प्रजापतिलाई पदमुक्त गर्न सिफारिस गरेका थिए।

उनीहरूले पार्टीको निर्देशन पटकपटक उल्लंघन गरी बागमतीमा सरकार गठनका लागि समर्थन गर्ने र सरकारमा सहभागी हुने कार्य गरेकाले प्रदेश सभा सदस्यबाट पदमुक्त गर्ने केन्द्रीय कार्यसम्पादन समिति बैठकले निर्णय गरेको लिङ्देनले बताएका छन्।

तर, थापाले लिङ्देनले पदमुक्त गर्न सिफारिस गरेको पत्र सार्वजनिक गर्दै भनेका छन्–गत भदौ ४ गतेपछि राप्रपा केन्द्रीय कार्यसम्पादन समितिको कुनै बैठक बसेको छैन। उनले पार्टी निकै संकटपूर्ण अवस्थामा रहेको तर्फ संकेत गर्दै अध्यक्ष लिङ्देनले चालेको कदमले आफू आश्चर्यचकित भएको बताए। उनले लिङ्देनले पदमुक्त गर्न सिफारिस गरेको पत्रमा बैठक बसेको मिति उल्लेख नभएकोले पत्र फेक हो कि भन्न लागेको बताएका हुन्।

यसअघि लिङ्देनले पार्टी संसदीय दलका नेता उद्धव थापालाई पार्टीको साधारण सदस्यसमेत नरहने गरी कारबाही गरेका थिए। उद्धवलाई गरेको कारबाहीप्रति नेता कमल थापासँगै पार्टीको ठूलो पंक्तिले विरोध गरेको छ। तर, लिङ्देन स्वेच्छाचारी ढंगले कारबाही गर्नबाट पछि हटेका छैनन्।

यस्तोमा तीन सांसदलाई पदमुक्त गर्न भन्दै पत्र पठाएपछि पार्टीको प्रतिनिधिसभा संसदीय दलका नेता ज्ञानेन्द्र शाही रुष्ट भएका छन्। उनी त अझ कतिपय सञ्चारमाध्यमले राप्रपाका तीन सांसद पदमुक्त भन्दै समाचार लेखेको भनी आक्रोशित भएका छन्। सांसद पदमुक्त कसरी हुन्छ ? संसदीय प्रक्रियाबारे जानकारी दिँदै उनले पदमुक्त भएको समाचारको कडा शब्दमा खण्डन गरेका छन्।

उनले प्रदेश सांसदहरू जनताको मतले निर्वाचित भएको भन्दै अध्यक्ष लिङ्देनले कारबाही गर्न नसक्ने आशय व्यक्त गरेका छन्।

बागमती प्रदेशमा नेकपा एमालेका किरणकुमार थापा मगरलाई मुख्यमन्त्री बनाउन राप्रपाका तत्कालीन संसदीय दलका नेता उद्धव थापालगायत सांसदहरूले समर्थन जनाएका थिए। विष्ट, तामाङसहित सांसदहरू मन्त्री बनिसकेका छन्। यस्तोमा निकै आक्रोशित बनेका लिङ्देनले कारबाहीको डण्डा चलाए।

जबकि, लिङ्देन गणतन्त्र नेपालको पहिलो प्रधानमन्त्री पुष्पकमल दाहाल ‘प्रचण्ड’को सरकारमा गणतन्त्रको सुदृढीकरण गर्ने भन्दै ३ माघ २०७९ मा उपप्रधान तथा ऊर्जामन्त्री भएका थिए। जतिबेला राप्रपालाई सरकारमा जाने जनादेश थिएन। पार्टीको सर्वसम्मत निर्णय पनि होइन। तर, आफू गणतन्त्रको उपप्रधान तथा ऊर्जामन्त्री हुने टुंगो लागेपछि राजतन्त्र भन्ने लिङ्देन खुट्टा उचालेर प्रचण्ड सरकारमा गए।

यतिबेला भने बागमतीमा आफ्ना दलका नेता र अन्य तीन जना नेता समर्थक मात्रै नभएर सरकारमै गएपछि कारबाही गरेका छन्। यसले पार्टीमा लिङ्देन–थापा सम्बन्ध अब तनावपूर्ण हुने देखिएको छ।

यसअघि लिङ्देनको मिच्ने शैलीको विरोध गरेपछि राजनीतिक सफाया गर्न खोजेको थाहा पाएसँगै महामन्त्री डा. धवलशम्शेर जबराले राप्रपा छाडेर जय नेपाल पार्टी गठन गरेका छन्। अब थापाले पनि आफ्नो बाटो तताउन सक्ने देखिएको छ।