पोखरा। भोटेकोशीमा आएको भीषण बाढीपछि विभिन्न जिल्लामा फेला परेका १०२ वटा शव कास्की ल्याइएको छ।

तनहुँ, नवलपुर, धादिङ र गोरखालगायत स्थानबाट ल्याइएका शव पोखरा स्वास्थ्य विज्ञान प्रतिष्ठानको शवगृहमा राखिएका छन्।

तर शव राख्ने ठाउँको अभावले कास्की प्रशासनलाई अर्को चुनौती थपिएको छ। प्रतिष्ठानको शवगृहमा एकपटकमा ८८ वटा शव राख्न सकिने क्षमता भए पनि केही शव पहिलेदेखि नै रहेकाले अहिले थप शव व्यवस्थापन गर्न कठिन भएको प्रमुख जिल्ला अधिकारी कुमानसिंह गुरुङले बताएका छन्।

बाढीबाट ल्याइएका सबै शव पूर्ण अवस्थामा छैनन्। केही शवका अंग मात्र फेला परेका छन् भने बालबालिकाका शवसमेत रहेका छन्। उपलब्ध स्थानअनुसार ती शव तथा अंगहरूलाई छुट्टाछुट्टै सुरक्षित राखिएको प्रशासनले जनाएको छ।

शवगृह भरिएपछि नयाँ शव राख्ने अवस्था तत्काल नरहेको अधिकारीहरूको भनाइ छ। अहिले राखिएका शवको पहिचान तथा कानुनी प्रक्रिया सकेर आफन्तलाई बुझाउने काम अघि बढाइनेछ। त्यसपछि मात्र नयाँ शव व्यवस्थापन गर्न सकिने अवस्था आउने बताइएको छ।

पहिचानका लागि प्रत्येक शवको फोटो तथा आवश्यक विवरण संकलन गरिएको छ। आफन्तले सनाखत गरेपछि सम्बन्धित शव कानुनी प्रक्रिया पूरा गरी परिवारलाई जिम्मा लगाइनेछ।

पहिचान खुल्न नसकेका शवको हकमा डीएनए परीक्षणका लागि नमुना संकलन गरिएको छ। लामो समयसम्म पनि सनाखत हुन नसकेका वा कसैले दाबी नगरेका शवलाई प्रचलित कानुनी प्रक्रिया पूरा गरेर अन्तिम संस्कार गरिने तयारी छ।

शव व्यवस्थापनको सम्पूर्ण प्रक्रिया मिलाउन जिल्ला प्रहरी प्रमुखको नेतृत्वमा समिति बनाइएको छ।

समितिले शवको अभिलेखदेखि पहिचान, आफन्तलाई हस्तान्तरण र आवश्यक परे अन्तिम संस्कारसम्मका कामको समन्वय गर्ने एसपी नवीन कार्कीले जानकारी दिएका छन्।