सिमकोट। यता राजधानीमा ग्यासको हाहाकारको समस्या समाधान नहुँदै हुम्लाको सिमकोटमा खाना पकाउने एलपी ग्यासको अभाव देखिएको छ।

लामो समयदेखि नियमित ग्यास आपूर्ति हुन नसक्दा अभाव चरमस्थितिमा पुगेको हो।

जिल्ला सदरमुकाम र सिमकोट बजार क्षेत्रमा ग्यास डीपोमा उपभोक्ताको लाइन छ।  भौगोलिक विकटता, ढुवानीको कठिनाइ र यातायातका साधनमा निर्भर आपूर्ति प्रणालीका कारण जिल्लामा दैनिक उपभोग्य वस्तुको नियमित आपूर्ति नभएका कारण ग्यास अभाव भएको जनाइएको छ।

बिहीबार बिहान नेपालगन्जबाट १५० वटा भरिएका ग्यास सिलिन्डर आइपुगे पनि २७० वटा खाली सिलिन्डर लाइनमा राखिएका थिए।

मागको तुलनामा आपूर्ति आधा कम भएपछि उपभोक्ताले ग्यास पाउने अवस्था नरहेको  व्यवसायीहरू बताउँछन्।

यस्तै,हुम्ला पुग्दासम्ममा भरिएको सिलिन्डरको ग्यासको मूल्य तीन हजार २०० पर्ने गरेको समेत गुनासो आउने गरेको छ।