पर्सा। क्यासिनोमा प्रवेश गरी जुवा खेलेको आरोपमा नेपाल प्रहरीका इन्स्पेक्टर र गाउँपालिका अध्यक्षसहित ८ जना पक्राउ परेका छन्।

इलाका प्रहरी कार्यालय पोखरियाबाट खटिएको टोलीले वीरगञ्ज महानगरपालिका–१४ गण्डकस्थित ‘गोल्डेन फिंगर गेमिङ जोन’बाट उनीहरूलाई पक्राउ गरेको जिल्ला प्रहरी कार्यालय पर्साका एसपी पवनकुमार भट्टराईले जानकारी दिए।

पक्राउ पर्नेमा प्रहरी इन्स्पेक्टर प्रदीप पौडेल, सखुवाप्रसौनी गाउँपालिका अध्यक्ष ३६ वर्षीय जसवन्त यादव, सोही गाउँपालिका–६ का ३० वर्षीय चन्दन सहनी र वीरगञ्ज–११ का ३९ वर्षीय ओमप्रकाश बैठा छन्।

नेपालीलाई क्यासिनो प्रवेश गराएको आरोपमा क्यासिनोका चार कर्मचारीसमेत पक्राउ परेका छन्। उनीहरूमा वीरगञ्ज–१४ का २८ वर्षीय विजयकुमार पटेल, वीरगञ्ज–२५ का ३१ वर्षीय दिनेशकुमार पटेल, महोत्तरी पिपरा गाउँपालिका–५ का ४९ वर्षीय जयदेव साह र वीरगञ्ज–१२ का ५० वर्षीय प्रदेशी साह रहेका छन्।

प्रहरीका अनुसार पक्राउ परेकामाथि आवश्यक अनुसन्धान भइरहेको छ।