काठमाडौं। धादिङको कृष्णभीरमा गएको पहिरोका कारण पृथ्वी राजमार्ग अवरुद्ध भएपछि काठमाडौं उपत्यकामा खाना पकाउने ग्यासको अभाव झन् बढेको छ ।

राजमार्ग बन्द भएको आठ दिन पुग्दा ग्याससहित पेट्रोलियम पदार्थ र अन्य अत्यावश्यक वस्तुको आपूर्तिसमेत प्रभावित भएको छ ।

रसुवाको भोटेकोशी हुँदै त्रिशूलीमा आएको बाढीले सडक कटान गरेपछि काठमाडौं जोड्ने मुख्य स्थलमार्ग अवरुद्ध भएको हो । सडकमा पहिरो खसेपछि काठमाडौं आउँदै गरेका ग्यास, पेट्रोलियम पदार्थ र खाद्यान्न बोकेका कतिपय सवारीसाधन बाटोमै रोकिएका छन् ।

ग्यासको आपूर्ति प्रभावित भएपछि काठमाडौंका विभिन्न बिक्री केन्द्रमा उपभोक्ताको भीड बढेको छ । नयाँसडकस्थित धर्मपथ क्षेत्रमा समेत ग्यास लिन सर्वसाधारण लामो लाइनमा बस्न थालेका छन् । काठमाडौं र आसपासका क्षेत्रमा रिफिलका लागि आउने ग्यास बुलेटसमेत नियमित रूपमा आउन सकेका छैनन् ।

ग्यासको समस्या राजधानीमा मात्रै सीमित छैन । देशका प्रमुख सहरका डिलरमा समेत उपभोक्ताको लाइन घटेको छैन । मूल्य बढे पनि मागअनुसार ग्यास पाउन नसक्दा उपभोक्ता थप समस्यामा परेका छन् । कतिपय उपभोक्ता ग्यासका लागि मध्यरातमै लाइन बस्न बाध्य भएका छन् ।

खाना पकाउने ग्यासको अभाव सडक अवरुद्ध हुनुअघिदेखि नै देखिँदै आएको थियो । पछिल्लो सडक अवरोधले त्यसलाई थप गम्भीर बनाएको छ।

लामो समयदेखि बजारमा देखिएको अभाव समाधान गर्न सरकारको प्रभावकारी पहल हुन नसकेको भन्दै उपभोक्ताले असन्तुष्टि जनाएका छन् ।

सम्बन्धित निकायले पहिरो हटाएर राजमार्ग सञ्चालनमा ल्याउने प्रयास गरिरहेका छन् । सडक छिट्टै सञ्चालनमा नआए काठमाडौं उपत्यकामा ग्यास, पेट्रोलियम पदार्थ तथा अन्य अत्यावश्यक वस्तुको आपूर्ति थप प्रभावित हुने जोखिम बढेको छ ।