काठमाडौं । अमेरिकाको मियामी अन्तर्राष्ट्रिय विमानस्थलमा अवतरण गर्ने क्रममा अमेजनको कार्गो विमान धावनमार्गबाट बाहिरिएर सवारीसाधनमा ठोक्किँदा कम्तीमा पाँच जनाको मृत्यु भएको छ ।

आइतबार भएको दुर्घटनामा पाँच जना घाइते भएका छन् । मियामी–डेड फायर रेस्क्युका प्रमुख रायद ‘रे’ जादाल्लाहका अनुसार घाइतेमध्ये तीन जनाको अवस्था गम्भीर छ । उनीहरूलाई ट्रमा सेन्टरमा उपचारका लागि भर्ना गरिएको छ भने अन्य दुई जनाको स्थानीय अस्पतालमा उपचार भइरहेको छ ।

धावनमार्गबाट बाहिरिएको विमान नजिकै रहेका सवारीसाधनमा ठोक्किएपछि ठूलो आगलागी भएको थियो । दुर्घटनापछि ६० भन्दा बढी उद्धार टोली घटनास्थल पुगेका थिए ।

उद्धारकर्मीले सवारीसाधनभित्र फसेकाहरूलाई बाहिर निकालेका थिए । विमानका पाइलटलाई पनि उद्धार गरी उपचारका लागि अस्पताल पठाइएको छ ।

फ्लाइटराडार २४ को विवरणअनुसार दुर्घटनामा परेको बोइङ ७६७ विमान धावनमार्गबाट बाहिरिँदा करिब १३० माइल प्रतिघण्टाको गतिमा थियो । विमान किन नियन्त्रणमा आउन सकेन भन्नेबारे प्रहरीले अनुसन्धान गरिरहेको छ ।