काठमाडौं । नेपाली कांग्रेसले १५औँ महाधिवेशनका लागि नयाँ कार्यतालिका सार्वजनिक गरेको छ। मंगलबार बसेको केन्द्रीय निर्वाचन समिति बैठकले वडा तहदेखि केन्द्रीय महाधिवेशनसम्मका कार्यक्रम तय गरेको हो।

निर्णयअनुसार देशभरका ६ हजार ७४३ वडामा आगामी असोज ३ र ४ गते अधिवेशन हुनेछ। त्यसपछि असोज ७ गते गाउँपालिका तथा नगरपालिकास्तरीय अधिवेशन गरिनेछ।

त्यस्तै, असोज १० गते प्रदेशसभा र प्रतिनिधिसभा निर्वाचन क्षेत्रीय अधिवेशन एकैदिन गर्ने कार्यतालिका बनाइएको छ। कांग्रेसको केन्द्रीय महाधिवेशन भने असोज १६ देखि १९ गतेसम्म आयोजना गर्ने निर्णय भएको छ।

निर्वाचन समितिका अनुसार जिल्ला तथा प्रदेश अधिवेशनको मिति भने केन्द्रीय महाधिवेशन सम्पन्न भएपछि तय गरिनेछ।