काठमाडौं। नेकपाका संयोजक पुष्पकमल दाहाल ‘प्रचण्ड’ले जेनजी आन्दोलनमा ठूलो षड्यन्त्र र घुसपैठ भएको दाबी गरेका छन्।

सिन्धुपाल्चोकमा आयोजित कार्यक्रममा उनले भदौ २३ गते भएको जेनजी आन्दोलन ‘अपहरण’ गरिएको भन्दै त्यसका पछाडि को थियो भन्ने प्रश्न उठाएका हुन्।

आन्दोलनमा घुसपैठ गर्ने व्यक्ति वा समूह र त्यसपछि देशको अवस्था कहाँ पुग्यो भन्ने विषयमा गहिरो अध्ययन आवश्यक रहेको उनको भनाइ छ। समयक्रमसँगै घटनाको सत्यतथ्य बाहिर आउने विश्वास पनि उनले व्यक्त गरे।

प्रचण्डले राष्ट्रिय मानवअधिकार आयोग र सुरक्षा निकायले तयार पारेका प्रतिवेदनसमेत गायब पारिएको आरोप लगाए। ती प्रतिवेदन वर्तमान सरकारको जिम्मेवारीमा रहेका व्यक्तिहरूले गायब पारेको आरोप लागिरहेको भन्दै उनले घटनाको सत्यतथ्य सार्वजनिक गर्न माग गरे।

भदौ २४ गते भएको विध्वंस कसले गर्‍यो भन्ने प्रश्न गर्दै प्रचण्डले भदौ २३ गते नै आन्दोलनकारीलाई घर फर्किन आग्रह गर्ने र आन्दोलनमा घुसपैठ तथा ‘अपहरण’ भएको बताउने पक्षले नै भोलिपल्टको विध्वंस गराएको हुन सक्ने तर्क गरे।

उनले भदौ २३ र २४ गतेका घटनाबारे निष्पक्ष अध्ययन गरी वास्तविकता बाहिर ल्याउनुपर्नेमा जोड दिए।