काठमाडौं। प्रतिनिधिसभाको अर्थ समितिले रसुवामा आएको बाढीले मुलुकको अर्थतन्त्रमा पारेको असर तथा जलवायु वित्त (क्लाइमेट फाइनान्स) सम्बन्धी विषयमा अध्ययन-विश्लेषण गर्न सांसद सुशिल खड्काको संयोजकत्वमा सात सदस्यीय उपसमिति गठन गरेको छ।

सिंहदरबारमा आयोजित समितिको बैठकले उक्त उपसमिति चयन गरेको हो।

उपसमितिका सदस्यहरूमा सांसदहरू नरेन्द्रकुमार केरुङ, परशुराम तामाङ, डा. पुष्पराज कँडेल, लिमा अधिकारी, पुष्प चौधरी र सुशान्त वैदिक रहेका छन्।

रसुवा बाढीका कारण पुगेको आर्थिक क्षति र जलवायु वित्तका विविध आयामबारे अध्ययन गरी आगामी असोज २ गतेभित्र प्रतिवेदन बुझाउने गरी उपसमितिलाई कार्यादेश दिइएको समितिका सभापति डा. कृष्णहरि बुढाथोकीले जानकारी दिए।