काठमाडौं । जननायक बीपी कोइरालाको जन्मजयन्तीमा नेपाली कांग्रेसका पूर्वमहामन्त्री डा. शशाङ्क कोइरालाले आफ्ना पिता मात्र होइन, नेपाली लोकतान्त्रिक आन्दोलनका एक युगपुरुषका रूपमा बीपीलाई सम्झिएका छन् ।

बीपीको जन्मजयन्तीको अवसरमा सामाजिक सञ्जालमार्फत सन्देश सार्वजनिक गर्दै डा. शशाङ्कले उनको राजनीतिक संघर्ष, विचार र योगदानको स्मरण गरेका हुन् । उनले बीपीलाई राष्ट्रिय एकताका संवाहक र स्वतन्त्र चिन्तनका अद्वितीय व्यक्तित्वका रूपमा चित्रण गरेका छन् ।

लोकतन्त्र स्थापनाका लागि बीपीले जेलदेखि निर्वासनसम्म भोगेका दुःख र संघर्ष नेपाली राजनीतिक इतिहासको महत्वपूर्ण अध्याय भएको शशाङ्कको भनाइ छ । व्यक्तिगत सुखभन्दा मुलुकको राजनीतिक स्वतन्त्रता र लोकतान्त्रिक व्यवस्थालाई प्राथमिकता दिएका बीपीको त्याग अहिले पनि स्मरणीय रहेको उनले बताएका छन् ।

शशाङ्कले बीपीको विचारमध्ये राष्ट्रियता, लोकतन्त्र, समाजवाद र राष्ट्रिय मेलमिलापलाई विशेष रूपमा सम्झिएका छन् । उनका अनुसार बदलिँदो राजनीतिक परिस्थितिमा समेत बीपीले अघि सारेका यी विचारको सान्दर्भिकता कम भएको छैन, बरु झन् बढेको छ ।

‘राष्ट्रियता, लोकतन्त्र, समाजवाद र राष्ट्रिय मेलमिलापको बीपीको दर्शन आजको नेपालका लागि झन् बढी सान्दर्भिक बनेको छ,’ उनले भनेका छन् ।

देशलाई सही दिशामा अघि बढाउन बीपीले देखाएको एकता, सहअस्तित्व र आशाको बाटो समात्नुपर्नेमा शशाङ्कले जोड दिएका छन् । उनका अनुसार राजनीतिक विभाजन र प्रतिशोधले मुलुकलाई निकास दिन सक्दैन ।

बीपीको ‘आशाको राजनीति’लाई अहिलेको आवश्यकता भन्दै शशाङ्कले सत्य, साहस र त्यागको बाटोमा अघि बढ्ने प्रतिबद्धता पनि व्यक्त गरेका छन् । समुन्नत, न्यायपूर्ण र लोकतान्त्रिक नेपाल निर्माणमा आफूलाई थप समर्पित गर्ने उनको भनाइ छ ।

देशभर कांग्रेसका नेता–कार्यकर्ताले विभिन्न कार्यक्रम गरेर बीपीको जन्मजयन्ती मनाइरहेका बेला शशाङ्कको सन्देशमा भने बीपीको स्मरणसँगै वर्तमान राजनीतिक अवस्थाप्रतिको संकेतसमेत देखिन्छ । उनले बीपीलाई सम्झँदै विभाजनभन्दा एकता र प्रतिशोधभन्दा आशाको राजनीति रोज्नुपर्ने सन्देश दिएका छन् ।