काठमाडौं। भोटेकोसी बाढीमा आफन्त गुमाएका परिवारको पीडा सामाजिक सञ्जालमा समेत उपहासको विषय बनेपछि नेपाली कांग्रेसकी सांसद सीता थपलियाले आपत्ति जनाएकी छन् ।

बुधबार बसेको प्रतिनिधिसभा बैठकमा बोल्दै थपलियाले विपत्तिमा परेका नागरिकले आफ्ना बेपत्ता आफन्तको खोजी गरिदिन सरकारसँग गरेको आग्रहको भिडियोमा आएका टिप्पणीप्रति असन्तुष्टि जनाइन् ।

उनले विपत्तिले परिवारका सदस्य गुमाएका मानिसको पीडालाई समेत हल्का रूपमा लिने प्रवृत्ति देखिनु दुःखद् भएको बताइन्। आफ्नै नेपाली दाजुभाइ तथा दिदीबहिनीबाट पीडितको भिडियोमा गरिएको टिप्पणीले आफूलाई थप दुःखी बनाएको उनको भनाइ थियो ।

‘आफ्ना परिवारका सदस्य हराएपछि खोजी गरिदिन सरकारसँग आग्रह गर्ने नागरिकको पीडामाथि यस्तो टिप्पणी गर्ने हिम्मत कसरी आयो ?’ भन्दै उनले प्रश्न गरिन् ।

थपलियाले विपत्तिमा परेका परिवारलाई थप चोट पुग्ने गरी सामाजिक सञ्जालमा टिप्पणी नगर्न पनि आग्रह गरिन् । ‘हामीभित्र मानवता हराइसकेको हो ? कृपया अरुको दुःखलाई मजाक नबनाऔँ,’ उनले भनिन् ।

प्रतिनिधिसभामै सांसद थपलियाले बजारमा देखिएको ग्यास अभावप्रति उद्योगमन्त्रीको ध्यानाकर्षण गराइन् । घरायसी उपभोक्ताले ग्यासका लागि सास्ती खेपिरहँदा सम्बन्धित मन्त्रालय भने बेखबरजस्तो देखिएको उनको आरोप थियो ।

उनले उपभोक्ताको घरआँगनमा सहज रूपमा ग्यास कहिले पुग्छ भन्दै सरकारसँग जवाफ मागिन् ।

विपत्तिका बेला अत्यावश्यक वस्तुको आपूर्ति सहज बनाउने जिम्मेवारीबाट सरकार पन्छिन नहुने उनको भनाइ थियो।