काठमाडौं। राष्ट्रिय स्वतन्त्र पार्टीका सांसद यज्ञमणि न्यौपानेले जेनजी आन्दोलनका क्रममा सडकमा उत्रिएका युवामाथि राज्यले गरेको व्यवहारप्रति प्रश्न उठाएका छन् ।

बुधबार प्रतिनिधिसभा बैठकमा बोल्दै उनले आन्दोलनमा सहभागी युवाहरू अझै जेलमा रहनु, अदालतमा तारिख धाउनु र न्यायिक प्रक्रियामा अल्झिरहनुपर्ने अवस्था आफैंमा लज्जास्पद भएको बताए ।

उनले जेनजी आन्दोलनबाट राजनीतिक परिवर्तनको वातावरण बने पनि त्यसै आन्दोलनका सहभागीले भने न्याय पाउन नसकेको विरोधाभास देखिएको बताए ।

‘आज पनि कैयौँ युवाहरू जेलमा छन्, उनीहरू तारिख लिन बाध्य छन् । अदालतको कठघरामा उभिनुपर्ने अवस्था छ,’ उनले भने, ‘त्यही जेनजी आन्दोलनको बलमा कोही हामी संसदमा छौँ, कोही सरकारमा छौँ । तर न्यायचाहिँ दुई खालको देखियो।’

न्यौपानेले सरकारसँग जेनजी आन्दोलनलाई औपचारिक रूपमा जनआन्दोलनको मान्यता दिन माग गरे । त्यसका लागि संसदमा सङ्कल्प प्रस्ताव ल्याउनुपर्ने उनको भनाइ छ ।

उनले आन्दोलनमा संलग्न भएर जेलमा रहेका युवाहरूलाई तत्काल रिहाइको वातावरण बनाउन पनि सरकारसँग आग्रह गरे ।

‘जेनजी आन्दोलनलाई जनआन्दोलनका रूपमा घोषणा गरियोस् । यसलाई सङ्कल्प प्रस्तावका रूपमा संसदमा प्रस्तुत गरियोस् र जेलमा रहेका युवाहरूलाई अविलम्ब रिहा गर्ने वातावरण सिर्जना गरियोस्,’ उनले भने ।

सांसद न्यौपानेले रसुवाको भोटेकोसी बाढीबाट भएको क्षतिलाई प्राकृतिक विपत्तिमा मात्र सीमित गरेर हेर्न नहुने तर्क गरे । उनले यसलाई अन्तर्राष्ट्रिय कानुन उल्लङ्घनसँग पनि जोडेर हेर्नुपर्ने बताए ।

बाढीमा सन्तान गुमाएका आमाहरूको पीडा र जेनजी आन्दोलनले उठाएका विषयलाई राज्यले सम्बोधन गर्न नसक्दा निराशा झन् गहिरिएको उनको भनाइ थियो ।

यही पीडाका बीच केही आमाहरू आत्मदाहको प्रयाससम्म गर्न बाध्य भएको प्रसंग उठाउँदै उनले राज्य संवेदनशील बन्नुपर्ने बताए ।

उनले विगतमा आमाहरूले आफ्ना सन्तान गुमाउनुपरेको अवस्था फेरि नदोहोरियोस् भन्दै राज्यले आन्दोलनका माग, पीडितको न्याय र युवामाथि चलिरहेका मुद्दालाई गम्भीरतापूर्वक सम्बोधन गर्नुपर्ने बताए ।